(Pa)siguria në Kosovë aktivizon mbrojtjen e NATO-s: Ministrat e Mbrojtjes që erdhën për vizitë në tremujorin e parë të vitit

Në një kohë sfiduese, posaçërisht pas tensioneve të fundit që u ngritën në nivele shpërthyese, në Kosovë erdhën për vizitë katër zyrtarë të lartë të vendeve anëtare të NATO-s. Ministri i Mbrojtjes së Gjermanisë, Boris Pistorius, më 5 shkurt, qëndroi në Prishtinë për situatën e rënduar të sigurisë në rajon, posaçërisht pas tensioneve të mprehta midis Kosovës dhe Serbisë.

Pistorius erdhi në Prishtinë së bashku me një delegacion të Parlamentit të Gjermanisë, anëtarë të Komisionit për Çështje të Sigurisë dhe Mbrojtjes, ku u adresua vizioni gjeostrategjik i Kosovës sa i përket integrimeve euro-atlantike dhe sigurisht, rrjedha e tensionuar e marrëdhënieve. Ai siguroi mbështetje të madhe për Kosovën, sikurse brenda, ashtu edhe jashtë vendit.

Gjermania pritet të dërgojë rreth 150 ushtarë në Kosovë në prill për të përforcuar kontigjentin prej 71 trupave gjermane në Forcën e NATO-s (KFOR), ndonëse u tha se vendimi për rritjen e prezencën në vend nuk ka të bëjë drejtpërdrejtë me tensionet aktuale ndërmjet Kosovës dhe Serbisë, por më tepër për të kompensuar tërheqjen e trupave austriake nga KFOR-i.

Ndërkohë, në përgjigje ndaj sfidave të sigurisë, në Kosovë qëndroi edhe ministri i Mbrojtjes së Polonisë, Wladyslaw Kosiniak-Kamysz, i cili në një takim me ushtarët e kontigjentit polak të KFOR-it, deklaroi se kudo që nevojitet prania e ushtarëve polakë, ata do të jenë atje për të ruajtur paqen dhe sigurinë, duke përmbushur detyrat që burojnë nga aleanca ushtarake.

Pjesëmarrja në misionin e KFOR-it shënon një nga misionet e para të ushtrisë polake brenda NATO-s. Në Kosovë ndodhet kontingjenti më i madh polak në krahasim me prezencën paqeruajtëse në vendet tjera – Rumani, Letoni dhe Turqi – me rreth 250 ushtarë, ndërsa përveç kontingjentit ushtarak, në Kosovë është i pranishëm edhe një kontingjent policor i Polonisë.

Kosovën e vizitoi edhe ministri i Mbrojtjes së Kroacisë, Ivan Anushiç, i cili gjithashtu adresoi situatën e sigurisë në vend dhe rajon, por edhe rolin e trupave kroate në kuadër të misionit paqeruajtës të KFOR-it në ngritjen e kapaciteteve mbrojtëse të Kosovës. Kroacia miratoi pjesëmarrjen e deri 160 pjesëtarëve të Forcave të Armatosura të Kroacisë (HKoV) në KFOR.

Serinë e vizitave në Kosovë e përmbylli ministri i Mbrojtjes së Italisë, Guido Crosetto, i cili qëndroi javën e kaluar në vend për të zbutur tensionet dhe shmangur përshkallëzimin e radhës mes palëve, por edhe për të shqyrtuar mundësitë për bashkëpunim midis Forcave të Armatosura të Italisë (FAI) dhe Forcës së Sigurisë së Kosovës (FSK) në dritën e këtyre zhvillimeve.

Në ndërkohë, kryeministri i Kosovës, Albin Kurti, deklaroi se Serbia ka dislokuar sisteme kundërajrore në afërsi të kufirit me Kosovën, derisa paralajmëroi edhe për riorganizimin e grupit të ish-nënkryetarit të Listës Sërpska, Millan Radoiçiç, i cili organizoi dhe kreu sulmin terrorist të 24 shtatorit në Banjë të Zveçanit në pjesën veriore të Kosovës me shumicë serbe.

Në raportin e përvjetshëm të vlerësimit të kërcënimeve globale të sigurisë, komuniteti i inteligjencës amerikane paralajmëroi ngritje të nivelit të rrezikut nga përshkallëzimi i mëtejmë i dhunës në Ballkanin Perëndimor përgjatë vitit 2024, derisa u përmenden tensionet midis Kosovës dhe Serbisë në pjesën veriore të Kosovës që karakterizuan rajonin në 2023.

Presidenti i Serbisë, Aleksandar Vuçiç, më 28 mars, deklaroi se Serbinë e presin “ditë të vështira” në të ardhmen, por pa specifikuar për çfarë realisht bëhet fjalë, ndërsa shtoi se për gjithçka do të flasë më shumë në “ditët në vijim”, duke nxitur komente në rrjetet sociale nëse ai po fliste për mundësinë e përfshirjes së Serbisë në një konflikt të armatosur në rajon.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.