Të premten mbrëma fluturuan helikopterë ushtarakë serbë mbi Jarinje, atje ku po qëndrojnë forcat speciale të policisë së Kosovës. Ndërsa mëngjesin e kësaj të shtune janë parë dhe dëgjuar aeroplanë ushtarakë të Serbisë duke naviguar mbi qiellin në pikat kufitare Jarinje dhe Bërnjak.
Serbët që kanë bllokuar rrugën prej ditësh, meqë Kosova filloi reciprocitetin për targat, e kanë përshëndetur këtë paradë të ushtrisë serbe me brohoritje dhe duartrokitje.
“Avionët fluturuan mbi Jarnje për disa minuta, ndërsa njësitë speciale të policisë së Kosovës i shikonin në heshtje”, shkruajnë mediat lokale në gjuhën serbe.
Edhe të premten, kur u panë helikopterët, ishte reagim i njëjtë i turmës, duke duartrokitur demonstrimin e forcës.
Pas këtyre zhvillimeve ka pasur reagime edhe nga NATO. Është kërkuar qetësim i situatës nga dy palët dhe ulje në tavolinë.
Në anën tjetër, gjatë në orët e para të mëngjesit të së shtunës, u dogjën dy zyra në qendrat komunale në Zubin Potok dhe Zveçan.
Kryeministri Kurti e quajti këtë një tendencë e Serbisë për të krijuar konflikt.
Po ashtu, gjatë natës, u kuptua se serbët që po protestojnë në Bërnjak kanë krijuar edhe një barrikadë me kamionë në rrugë, duke e çuar kështu në 3, numrin e barrikadave atje.
Barrikada ka edhe në Jarinje, në së paku dy vende të rrugës.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
