Paratë dhe misteri i valixheve, Taulanti nuk mban më mbiemrin Pasho

Pas gjetjes së tij në një burg zviceran në Baden, zbulohet se Taulant Pasho nuk mban më mbiemrin e familjes së tij, pasi e ka ndërruar atë falë një martese në Shqipëri. Ligjërisht, ai tashmë njihet si Taulant Çela.

Djali i çiftit të masakruar brutalisht dhe të futur në katër valixhe të hedhura në një fushë pranë burgut të Sollicciano-s, ka kryer këtë lëvizje për t’i shpëtuar syve të policisë italiane për akuzat që rëndojnë mbi të.

Edhe pse ja doli për pak kohë, shenjat digjitale të gishtave bënë të mundur gjetjen e menjëhershme të tij pasi u shpall në kërkim nga Interpoli. Në të dhënat që zotëron policia italiane, gjurmët e gishtave të Taulantit janë të njohura.

Ende nuk dihet nëse ai ka të bëjë me vrasjen e prindërve të tij, Shpëtimit dhe Teutës, por të gjitha pistat e policisë shpien në dy hamendësime: Taulanti është pjesëmarrës ose krimi është bërë si një mesazh ndaj tij!

Për policinë italiane ishte e papritur që ai të gjendej në Zvicër, pasi ata mendonin se ai ndodhej në Shqipëri. Jo shumë kohë më parë, në profilin i tij në Facebook, Taulanti postonte foto dhe video garash që kryente me motor uji, në një det, që dukej si ai i Vlorës.

Dënimi i tij në Zvicër përfundon me ardhjen e vitit të ri, por ai ka shumë përgjigje për të dhënë përpara drejtësisë italiane. Ai ka dhe një dënim aktiv aty, prej jo pak, por thuajse katër vitesh, pasi Gjykata Italiane e ka dënuar për trafikimin e gjashtë kilogramëve marijuanë.

Edhe pse Taulanti, tashmë Çela, është personi kyç për zgjidhjen e vrasjes barbare të prindërve të tij, nuk dihet ende nëse ai ka pasur kontakt me ta në dy nëntor 2015, ditën kur ai, lirohej nga burgu në Itali, për të shkuar në arrest shtëpie. Në fakt, nuk dihet as ku ka qenë në atë ditë, pas lirimit të tij.

Sipas dëshmive të deri tanishme, edhe pse janë kontradiktore, çifti Pasho ishin të pa gjendshëm që kur ai ndodhej ende në burg.

Një faktor tjetër kyç për këtë çështje, janë ato 40 mijë Euro që Shpëtimi po ruante, ndoshta pikërisht për djalin e tij, i cili dilte nga burgu atë ditë. Sipas dëshmive, Shpëtimi mori 40 mijë Euro dëmshpërblim si pasojë e një aksidenti në punë.

Kanë dëshmuar deri tani dy motrat Pasho, Dorina dhe Viktoria, ish e fejuara e Taulantit, Elona si dhe familjarë të tjerë dhe avokatët e tyre. Nga dëshmitë, nuk ka një koherencë mbi ngjarjen, madje shpesh, ato ndeshen njëra me tjetrën.

Pritet dëshmia e Taulantit për të hedhur më shumë dritë mbi krimin tronditës të Firenze-s, por kemi edhe një familjar tjetër të dalë në skenë, i cili kërkon të pasurojë dëshminë e tij të mëparshme.

Vëllai i Shpëtimit, Dritani, ka kërkuar që të dëshmojë sërish mbi rastin. Avokatja e tij, Elisa Baldocci, thotë se “ai mendon se ka gjëra të reja të dobishme për të thënë”.

Ndërkohë, mjekësia ligjore po heton mbetjet e trupave dhe valixhet, me shpresën se aty, fshihen gjurmët e autorëve të vrasjes së Pashove.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.