Parada e Korgjive në nderim të Mbretëreshës Elizabeth, përpara përvjetorit të parë të vdekjes së saj

Mbretëresha Elizabeth është e njohur për dashurinë e saj për kafshët, veçanërisht për racën e qenve që e kishte të pranishme në dinastinë e saj duke filluar me kafshën shtëpiake që monarku mori si dhuratë për ditëlindjen e 18-të.

Kësisoj, Mbretëresha Elizabeth u kujtua në një mënyrë të veçantë – dhe shumë të përshtatshme, shkruan People, transmeton AlbanianPost.

Një grup prej rreth 20 fansash mbretërorë dhe kafshët e tyre shtëpiake morën pjesë në një paradë jashtë Pallatit Buckingham në Londër për të shënuar përvjetorin e parë të vdekjes së monarkut të ndjerë.

Kafshët ishin zbukuruar për këtë rast me kurora, diadema dhe veshje të tjera mbretërore.

Agatha Crerer-Gilbert, e cila organizoi ngjarjen përkujtimore, tha se shpreson që parada të zhvillohet çdo vit në të ardhmen.

“Unë nuk mund të shoh një mënyrë më të mirë për ta kujtuar atë sesa përmes korgjisë së saj, përmes racës që ajo e donte dhe e ushqente gjatë gjithë jetës së saj”, tha ajo për Mbretëreshën Elizabeth, e cila vdiq më 8 shtator të vitit 2022, në moshën 96-vjeçe.

“E dini, unë ende nuk mund të mësohem me faktin se ajo nuk është fizikisht rreth nesh, por ajo po na shikon. Shiko, dielli po shkëlqen, mendova se do të shkëlqejë mbi ne sot”, shtoi Crerer-Gilbert.

Crerar-Gilbert dhe bashkëshorti i saj, Fernando, janë pronarë të qenit të tyre 5-vjeç, i cili mori pjesë në paradë me kostum dhe ata thanë se do të “vazhdojnë traditën mbretërore për të pasur gjithmonë një korgi”, duke shtuar se “pronarët e korgjive do t’i kenë përgjithmonë borxhli Mbretëreshës”.

“Shumë prej nesh mendojnë se shfaqja e respektit dhe dashurisë sonë të qëndrueshme për Mbretëreshën shprehet më së miri përmes bashkimit të komunitetit të korgjive”, tha Crerar-Gilbert.

“Ata janë shumë lozonjarë dhe sjellin buzëqeshje në shumë fytyra. Pas vdekjes së Mbretëreshës, ata ndihmuan për të ngritur humorin dhe mendoj se ajo do ta miratonte shumë këtë mbledhje. Ndihet si mënyra e përsosur për të nderuar trashëgiminë e saj”, shtoi tutje ajo.

Caroline Perry, autorja e “The Corgi and the Queen”, thotë se përvjetori i vdekjes së Mbretëreshës është një kohë me rëndësi të madhe për pronarët e korgjive.

“Që kur ajo ishte një vajzë shumë e re, Elizabeta ishte e pushtuar nga raca. Dashuria e përjetshme e Mbretëreshës Elizabeth për racën Korgji filloi në vitin 1933 kur babai i saj, Mbreti Xhorxh VI, solli në shtëpi një qen të kësaj race, të quajtur Dookie nga një lukuni lokale. Së shpejti pasoi një i dytë, i quajtur Jane”, tha ajo.

“Dhe në ditëlindjen e saj të 18-të, dhurata e vetme që donte ishte një qenush i saj Korgji. Ai qen, Susan, ishte matriarku i një dinastie mbretërore të qenve, me 30 korgji që rrjedhin drejtpërdrejt nga këlyshi, të cilin shumë e konsiderojnë si një nga dashuritë e vërteta të jetës së Elizabeth-it”, përfundoi ajo.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.