Shqipëria

Pandemia – ‘efekt pozitiv’ për punësimin e të arsimuarve


Pandemia nuk reflektoi ndryshim vetëm te punësimi në përgjithësi.

Një “luhatje” ndodhi dhe te punësimi në bazë kategorish – të arsimuar dhe të paarsimuar.

Nga të dhënat e fundit të INSTAT-it (Institucioni i Statistikave në Shqipëri) rezulton se, në tremujorin e dytë të vitit 2021, personat me arsim të lartë e kanë pasur më të lehtë për t’u punësuar.

Eksperti i Arsimit, Ndriçim Mehmeti, për Albanian Post shpjegon se, nisur nga fakti që “pandemia mbylli një seri biznesesh” dhe mundësinë për të punuar nga shtëpia e kishin veç një numër i caktuar profesionistësh, “kjo është normale”.

Eksperti i arsimit, Ndriçim Mehmeti

“Këto punë”, sipas tij, “mund të bëhen vetëm nga ata që janë të mirëshkolluar, por edhe nga profesionistë, kryesisht në fushën e IT dhe mirëmbajtjes së rrjeteve elektronike”.

Ndërsa Aldi Qose, konsulent biznesi dhe specialist punësimi në kompaninë “Partner.al”, për Albanian Post thotë se është vënë re një rritje e kërkesave për profesione teknike nga klientët dhe në pozicionet e tjera vakante.

Sipas tij, eksperienca është “faktori kryesor në punësim dhe jo edukimi”.

“Nëse po flasim për të pashkolluar dhe pa asnjë arsim profesional, nuk kemi pasur asnjëherë kërkesë, por gjithmonë është eksperienca në profile dhe punë të caktuara që i avantazhon njerëzit në kërkimin e punës”.

Nga ana tjetër, eksperti Mehmeti thotë se disa profesione “kurrsesi nuk mund të zhvillohen nga shtëpia”.

“Në Shqipëri kemi në shumicë biznese tradicionale, pra që punojnë drejtpërdrejtë me klientin dhe jo në mënyrë virtuale”, ravijëzon ai.

Sipas Mehmetit, “kushtet e reja të punës”, nxorën jashtë lojë një grup të punësuarish, “që nuk ju përgjigjen dot këtyre zhvillimeve të reja dhe për më tepër u gjendën krejtësisht të papërgatitur për këto ndryshime të thella në jetën e tyre”.

Për ekspertin, këto lëvizje nuk janë pozitive.

“Me shumë mundësi shumë të rinj duan të vazhdojnë vetëm arsimin e lartë dhe do të bjerë interesi për profesionet. Kështu do të rritet pasiguria për punësim, çka do t’i çojë në përfundimin se largimi jashtë vendit është rruga e duhur”.

Por, specialist i punësimit Qose thotë se nuk është për t’u shqetësuar diçka e tillë. Madje, sa u përket kërkesave gjatë viteve të fundit “kërkesa për punonjës ka ardhur duke u rritur, çdo muaj dhe është katërfishuar dy vitet e fundit krahasuar me 2018-2019-ën”.

Nga ana e Mehmetit u theksua gjithashtu se në vend nuk ka një plan veprimi për këto kushte, për të zbutur efektet e kësaj situate.

Eksperti, në përmbyllje, jep dhe disa këshilla sesi mund të bëhen përmirësime.

“Një plan veprimi konkret, mbështetja financiare për të trajnuar të rinjtë dhe jo vetëm, me qëllim mundësi më të mira punësimi. Sigurisht që kjo kërkon edhe një studim tregu, për të parë se ku mund të ripërtërihen bizneset e mbyllura, çfarë mundësish ofrohen pas pandemisë dhe si mund të jetë efikase ekonomia jonë përballë këtyre sfidave”.

Për të, kjo kërkon një riformatim të arsimit profesional dhe, në tërësi të sektorit të arsimit, i cili duhet të jetë më shumë i lidhur me tregun e punës.

/Albanianpost.com


Lajmet kryesore