Pandeli Majko shpallet “Qytetar Nderi” i Rahovecit

Pandeli Majko, ish-kryeministri i Shqipërisë gjatë kohës së luftës së fundit në Kosovë, të premten, është shpallur qytetar nderi i Komunës së Rahovecit, për kontributin e tij gjatë luftës.

I emocionuar për lëvdatat që iu thanë atij nga kryetari Smajl Latifi dhe të tjerët, Majko ka thënë se detyra e tij ishte të mos tradhtonte vetën, kombin dhe Kosovën.

Por, megjithatë ish-kryeministri shqiptar ka theksuar se kontributi i tij nuk mund të krahasohet me ushtarët e Ushtrisë Çlirimtare të Kosovës (UÇK), që dhanë jetën për liri.

“Nuk mendoj se ato që i kam bërë mund të krahasohen me ato që kanë bërë ushtarët e UÇK-së që kanë dhënë gjënë më të shtrenjtë që është jeta. Detyra e kryeministrit ishte mos të tradhtonte vetën, kombin dhe Kosovën. Ishte një gjest simbolik pasi isha dhe jam i bindur se ShBA, Britania e Madhe dhe NATO nuk na lënë, as nuk do të na lënë sepse me luftën e Kosovës ka qenë jo vetëm fitore”, ka thënë Majko.

Ndërsa, kryetari Latifi, ka thënë se Majko ishte njeriu i duhur në kohën dhe momentin e duhur për Kosovën dhe popullin e saj.

“Kosova mbetet çështje e zemrës për atdhetarin Pandeli Majko. Qëndrimi i tij i prerë e ka rritur krenarinë tonë kombëtare”, ka thënë Latifi.

Gjithashtu, Ambasadori i Shqipërisë në Kosovë, Petrit Malaj, ka theksuar ndihmën e Majkos si kryeministër i Shqipërisë për shqiptarët e Kosovës.

“Ka qenë një zë i fuqishëm dhe një mik i madh i cili vazhdon të jetë një mik i Kosovës. Nën drejtimin e tij Shqipëria priti qindra e mijëra shqiptarë të Kosovës. Luajti një rol kyç në intervenimin e NATO-s në Kosovë. Kontributi i tij nuk do të harrohet asnjëherë”, ka shtuar Malaj.

I pranishëm në këtë ngjarje ishte edhe kryetari i Aleancës për Ardhmërinë e Kosovës (AAK), Ramush Haradinaj.

“Ai ishte kryeministër i luftës që në momentet më vendimtare për Kosovën dha kontribut shumë të çmueshëm. E falënderova për shërbimin e tij ndaj Atdheut”, ka shkruar Haradinaj në Facebook.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.