Skuadra e cila e fitoi Copa Libertadores, Palmeiras, ka arritur të kualifikohet në kuadër të Kupës së Botës për klube.
Ky turne që zhvillohet që shumë vite, dhe mbledh bashk skuadrat kampionë të çdo kontinenti, është futur në fazën finale.
Gjysmëfinalja e parë, që u zhvillua në “Al Nahyan Stadium” në Abu Dhabi, pa përballë skuadrën braziliane të Palmeiras dhe egjiptianët e Al Ahly-t.
Ndeshja, në fakt, nuk kishte shumë histori.
Palmeiras, ashtu siç pritej, e dominoi takimin, edhe me paraqitje por edhe me gola.
Dominimi i vazhdueshëm në pjesën e parë, u shpërblye me gol pak minuta para mbylljes së fraksionit hapës të takimit.
Mesfushori 26-vjeçar, Raphael Veiga, u asistua shumë bukur nga Dudu, për të shënuar golin e parë në ndeshje, në minutën e 39-të.
Me rezultat 1-0 u mbyll pjesa e parë e takimit.
Sapo filloi pjesa e dytë, Veiga vendosi që t’ia kthejë favorin Dudu-s.
Në minutën e 49-të, ndryshja ndërruan rolet, me Veiga-n që ishte asistues dhe Dudu-n që gjeti rrugën e rrjetës.
Epërsi prej dy golash i ofroi komoditetin e duhur brazilianëve, që deri në fund nuk rrezikuan asgjë, duke ruajtur rezultatin dhe duke arritur kualifikimin në finale.
Finalja zhvillohet ditën e shtunë, kurse Palmeiras do të mësojë kundërshtarin e saj nga fituesi i takimit Al-Hilal dhe kampionëve të Evropës, Chelsea-s.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
