Fermerët e krahinës së Myzeqesë në Shqipëri, të hënën e 15 nëntorit, kanë vijuar me protestën e tyre kundër paketës fiskale të miratuar nga Qeveria.
Sipas kësaj pakete, norma e kompensimit të prodhuesit bujqësor është propozuar që të bëhet 0% nga 6%, që është aktualisht, dhe njëkohësisht të zëvendësohet skema e subvencionimit.
Në këtë mënyrë, fondi në dispozicion për fermerët do të reduktohet me 2%.
Eksperti i bujqësisë, Ervin Resuli, në një prononcim për Albanian Post (AP) thekson se, heqja e 6%-shit do të ulë edhe atë pak interes që kanë pikat e grumbullimit.
Sipas tij, nga ky vendim do të preken edhe serat.
Protestuesit kanë kërkuar pikërisht këtë gjë. Ata i kanë drejtuar Qeverisë gjashtë kërkesa.
Nga marshimi i fermerëve, kreu i Sindikatës së Fermerëve të Bashkuar, Eduard Sharka, deklaroi se qëllimi kryesor është sensibilizimi i ligjvënësve.
“Qeveria nuk duhet ta kalojë paketën fiskale dhe projekt-buxhetin pa u konsultuar me propozimet dhe kërkesat tona”, u shpreh ai.
Sipas Sharkës, fermerët po braktisin serat, fshatin dhe Shqipërinë.
Propozimi i tyre i parë është subvencioni direkt për fermerët jo më pak se 100 lekë të vjetër për kilogramë.
“Ky nuk është instrument lëmoshe, as mbështetje sociale, por një mënyrë për të formalizuar sektorin që është 90% informal”, tha kreu i Sindikatës.
Eksperti Resuli propozon që të barazohet TVSH-ja “6% në prodhim dhe në shitje”.
Sipas tij, kjo do të jetë e ngjashme me atë që po zbatohet në rajon.
“Edhe industria e përpunimit të qumështit merr një goditje duke rritur deficitin nga 14 % në 20% në momentin e blerjes. Kjo do sjellë interes për qumësht jashtë territorit shqiptar”, thotë eksperti.
Ai ravijëzon se barazimi i TVSH-së 6% në prodhim dhe 6% në shitje, siç e ka rajoni, do të ishte në të mirë të fermerëve.
“Kemi tre vjet që e kemi zero në blerje dhe 20 në shitje. Kjo i ka bërë operatorët të sektorit të bujqësisë në një diskutimin fiskal, kjo ka ulur interesin për produktin vendas”, tha Sharka nga protesta.
Paketa e re fiskale
Nëse fermerët shisnin 1 produkt për 100 lekë, ata përfitonin 6 lekë rimbursim të TVSH-së, gjë që me këtë paketë të re fiskale shkon në zero.
Nga ana tjetër, fermerët duhet të vijojnë të paguajnë 20% të TVSH-së për produktet që blejnë.
Kjo skemë, shpesh, ka qenë e prekur nga ndryshimet e miratuara në Qeveri të ndryshme.
Kompensimi prej 6% u vendos si fillim në 2019-ën, pasi deri në atë kohë ishte 20%.
Në buxhetin e saj, Ministria e Bujqësisë ka parashikuar 12 miliardë lekë për fermerët nga 13.1 miliardë që ishin këtë vit.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
