Pajisja e parë në botë e epilepsisë ka reduktuar krizat e pacientit gjatë ditës me 80%

Një djalë me epilepsi është bërë pacienti i parë në botë që provon një pajisje të re të vendosur në kafkën e tij për të kontrolluar krizat.

Neurostimuluesi, i cili dërgon sinjale elektrike thellë në trurin e tij, ka reduktuar krizat e ditës të Oran Knowlson me 80 për qind.

Nëna e tij, Justine, i tha BBC-së se ai ishte më i lumtur dhe kishte një “cilësi shumë më të mirë të jetës”.

Kirurgjia u krye në tetor si pjesë e një prove në spitalin Great Ormond Street në Londër, kur Oran – i cili tani është 13 – ishte 12 vjeç.

Oran, nga Somerset, ka sindromën Lennox-Gastaut, një formë epilepsie rezistente ndaj trajtimit, të cilën e zhvilloi në moshën tre vjeçare.

Kur ekipi i BBC-së foli për herë të parë me nënën e tij vjeshtën e kaluar, para operacionit, ajo shpjegoi sesi epilepsia e Oranit dominonte jetën e tij.

“I ka rrëmbyer të gjithë fëmijërinë”.

Ajo tha se Oran kishte një sërë krizash të ndryshme, duke përfshirë ato ku ai bie në tokë, dridhet dhe humb vetëdijen.

Ajo tha se nganjëherë i ndalon frymëmarrja dhe nevojitet mjekim urgjent.

Oran ka autizëm dhe ADHD, por Justine thotë se epilepsia e tij është padyshim pengesa më e madhe.

“Kam pasur një trevjeçar mjaft të zgjuar dhe brenda pak muajsh nga fillimi i konvulsioneve, ai u përkeqësua me shpejtësi dhe humbi shumë aftësi”.

Oran është pjesë e projektit CADET – një seri provash që vlerësojnë sigurinë dhe efektivitetin e stimulimit të thellë të trurit për epilepsinë e rëndë.

Partneriteti përfshin Great Ormond Street Hospital, University College London, King’s College Hospital dhe Universitetin e Oxford-it.

Neurotransmetuesi Picostim sakaq është prodhuar nga kompania britanike Amber Therapeutics.

Krizat e epilepsisë shkaktohen nga shpërthime jonormale të aktivitetit elektrik në tru.

Pajisja, e cila lëshon konstant rrymë, synon të bllokojë ose prishë sinjalet jonormale.

“Unë dua që ai të gjejë përsëri pak nga vetja përmes mjegullës së krizave. Do të doja të ktheja djalin tim”, tha Justine para operacionit.

Operacioni, i cili zgjati rreth tetë orë, u zhvillua në tetor 2023.

Ekipi, i udhëhequr nga konsulenti neurokirurg pediatrik Martin Tisdall, futi dy elektroda thellë në trurin e Oranit derisa arritën në talamus, një stacion kryesor përcjellës për informacionin neuronal.

Marzhi i gabimit për vendosjen e mekanizmit ishte më pak se një milimetër.

Skajet u lidhën me neurostimulatorin, një pajisje katrore 3,5 cm dhe trashësi 0,6 cm e cila u vendos në një hendek në kafkën e Oranit ku ishte hequr kocka.

Neurostimulatori më pas u vidhos në kafkën përreth, për ta ankoruar në vend.

Stimulimi i thellë i trurit është provuar më parë për epilepsinë e fëmijërisë, por deri më tani neurostimuluesit vendoseshin në gjoks, me tela që shkonin deri në tru.

Oranit iu dha një muaj për t’u rikuperuar nga operacioni përpara se të ndizej neurostimulatori.

Kur është ndezur, Oran nuk mund ta ndiejë atë. Dhe ai mund ta rikarikojë pajisjen çdo ditë nëpërmjet kufjeve me valë, ndërsa vazhdon me gjërat që i pëlqejnë, si shikimi i televizorit.

Ekipi i BBC-së e vizitoi Oranin dhe familjen e tij shtatë muaj pas operacionit për të parë se si po kalonin.

Justine tha se kishte pasur një përmirësim masiv. “Ai është më vigjilent dhe pa kriza pikash gjatë ditës”.

Konvulsionet e tij gjatë natës janë gjithashtu “më të shkurtra dhe më pak të rënda”.

“Patjetër që po e kthej ngadalë”, tha ajo.

Oran tani merr leksione kalërimi, të cilat dukshëm i pëlqen.

Edhe pse një infermiere është gati me oksigjenin, dhe një nga mësuesit e tij është gjithmonë afër për çdo rast, asgjë nuk ka qenë e nevojshme deri më tani.

Si pjesë e provës, tre fëmijë të tjerë me sindromën Lennox-Gastaut do të pajisen me neurostimulatorin e thellë të trurit.

Aktualisht, Oran merr një stimul elektrik të vazhdueshëm nga pajisja e tij.

Marrë nga “BBC”, përshtatur për “Albanian Post”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.