Shqipëria

Pagat në rritje, por mungojnë punëtorët


Viti 2023 ka përjetuar një mungesë të paprecedentë të fuqisë punëtore.

Dorëheqja e punëtorëve dhe hapja e vendeve të punës ka prekur pikën maksimale të të gjitha kohërave.

Përpos shteteve të mëdha, ky trend e ka prekur dhe Shqipërinë.

Punëdhënësit duhet të konkurrojnë për një grup më të vogël punëtorësh dhe të ofrojnë paga vazhdimisht më të larta për t’i tërhequr ata. Kjo, sipas ekonomistëve do të nxisë rritjen e pagave dhe inflacionin.

Lidhur me fenomenin e mungesës së fuqisë punëtore, Albanian Post ka kontaktuar bashkëthemeluesin e kompanisë së rekrutimit “Partner.al”, Aldi Qose.

Në nisje të fjalës së tij, ai bëri me dije se problematikat kanë qenë kryesisht në sektorin e shërbimeve, Horeca (hoteleri dhe restorante).

“Problemi kryesor është në çdo kompani që ka lidhje me prodhimin dhe përpunimin. Këto janë kompani që e kanë ndjerë shumë nevojën e fuqisë punëtore. Dua të sqaroj se nuk është mungesë e fuqisë punëtore, por mbi të gjitha është mungesë për të punuar në sektorë të caktuar të biznesit”.

Kjo, pasi sipas Qoses, gjeneratat e reja nuk e shohin të ardhmen e tyre në industri të caktuara.

Duke analizuar situatën në tregun shqiptar, njohësi i sipërmarrjes thotë se shërbimet bazike të kujdestarisë, higjienës dhe sanitarizmit janë më së shumti në krizë.

Këto pozicione, thekson ai, kanë pasur edhe rritjen më të madhe të pagës në propocion me çdo pozicion tjetër këto tre vitet e fundit.

Sa i përket kërkesave të punëkërkuesve dhe punëdhënësve, Qose thekson se të dyja palët bashkohen në një pikë.

Të dyja duan më shumë, duke ofruar më pak.

Pra, “punëdhënësi kërkon më shumë angazhim dhe punë për një shpërblim sa më të ulët, ndërsa punëmarrësi kërkon më shumë përfitime (jo vetëm paga, por fundjava pushim, festat zyrtare, lejet e zakonshme). Shohim një trend të punëmarrësve që vlerësojnë më shumë kushtet e punës sesa drejtpërdrejt pagën dhe përfitimin financiar”.

Qose ndër të tjera thekson se ka një perceptim të gabuar për tregun e punës, por është në ristrukturim e sipër.

“Ne si kompani rekrutimi jemi një amartizor ndërmjet kompanisë dhe individit. Me fjalë të tjera ne përkthejmë kërkesat e të dyja palëve në një gjuhë ku merren vesh dhe procesi i punësimit funksionon. Është e vërtetë që ka shumë kërkesë për punonjës, por një kërkesë pa një paketë të strukturuar dhe realiste të atyre që ofron kompania nuk do të jetë asnjëherë tërheqëse për punëmarrësit”, tha ai për AP.

Ajo që mbetet për të kuptuar në fund të ditës mbetet se ekonomia drejtohet nga njerëzit, kështu që pa një grup punëtorësh në rritje, tregu i punës mund të jetë i ngushtë për ca kohë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com


Lajmet kryesore