Paga minimale në Shqipëri mbetet më e ulëta në Evropë në bazë të fuqisë blerëse

Paga minimale në Shqipëri – paçka rritjeve të vazhdueshme – vazhdon të mbetet ndër më të ulëtat në Evropë në vlerë nominale.

Por e fundit në fuqinë blerëse, sipas një renditjeje të fundit që ka bërë instituti Evropian i Statistikave (Eurostat).

Shqipëria megjithatë ia ka kaluar Maqedonisë së Veriut, për pagën minimale në vlerë, por kur renditet sipas fuqisë blerëse, ajo kalon sërish në vend të fundit.

Grafiku i publikuar nga Eurostat tregon diferencë relativisht të lartë kur matet sipas standardeve të fuqisë blerëse (PPS) për pagën minimale në Shqipëri, me Serbinë, Malin e Zi dhe Maqedoninë.

Eurostat i krahason pagat minimale bruto të zbatueshme më 1 korrik 2024, pas përshtatjes së tyre me diferencat e çmimeve midis vendeve.

Një krahasim ky, i cili realizohet duke përdorur barazinë e fuqisë blerëse (PPP) për shpenzimet e konsumit final të familjeve.

Ky rregullim redukton dallimet ndërmjet vendeve. Paga minimale e matur sipas barazisë së fuqisë blerëse (PPP) në Shqipëri është më e ulëta në Evropë dhe midis vendeve kandidate me 556 PPS.

Më e larta nga vendet kandidate është në Turqi, me 919 PPS, e ndjekur nga Mali i Zi, Serbia, Maqedonia e Veriut dhe në fund Shqipëria.

Shqipëria – sipas pagës nominale në vlerë – renditet e treta me pagën më të ulët minimale në Evropë, duke lënë pas nga Rajoni Maqedoninë e Veriut.

Në Evropë, dy shtetet me pagën më të ulët minimale janë Moldavia dhe Ukraina.

Në Shqipëri, paga minimale ka arritur në 40 mijë lekë bruto në muaj pas rritjeve të vazhdueshme që bëri qeveria dy vitet e fundit, në një gatë të ethshme për të barazuar pagat me rajonin.

Serbia dhe Mali i Zi vijojnë të kryesojnë, paga minimale i ka kaluar 500 euro/muaj.

Eurostat ka sqaruar sakaq se për vendet monedha kombëtare e të cilave nuk është euro: Bullgaria, Çekia, Hungaria, Polonia dhe Rumania, vendet kandidate dhe kandidate potenciale përveç Malit të Zi[1] si dhe Shtetet e Bashkuara, paga minimale është konvertuar në euro duke përdorur shkëmbimin norma në fuqi në fund të qershorit 2024.

Vetëm nga zhvlerësimi i euros paga minimale në Shqipëri rezulton rreth 10% më e lartë kur konvertohet në euro.

Më 1 korrik 2024, 22 nga 27 vendet e BE-së kishin një pagë minimale kombëtare.

Vendet e BE-së pa pagë minimale kombëtare ishin: Danimarka, Italia, Austria, Finlanda dhe Suedia. Pagat minimale mujore ndryshojnë shumë në shtetet anëtare, nga 477 € në Bullgari në 2 571 € në Luksemburg.

Midis 10 vendeve kandidate dhe kandidate potenciale, shtatë kishin një pagë minimale kombëtare (Mali i Zi, Moldavia, Maqedonia e Veriut, Shqipëria, Serbia, Turqia dhe Ukraina).

Kurse Bosnja dhe Hercegovina, Gjeorgjia dhe Kosova nuk kishin një pagë minimale kombëtare.

Bazuar në nivelin e pagave të tyre minimale mujore bruto kombëtare të zbatueshme më 1 korrik 2024, të shprehura në euro, vendet e BE-së në fjalë mund të klasifikohen në tre grupe të ndryshme:

-Grupi 1, me një pagë minimale kombëtare mbi 1 500 € në muaj. Në këtë grup bëjnë pjesë: Luksemburgu, Irlanda, Holanda, Belgjika, Gjermania dhe Franca. Pagat e tyre minimale kombëtare varionin nga 1 767 € në Francë në 2 571 € në Luksemburg.

-Grupi 2, me një pagë minimale kombëtare mbi 1 000 € dhe nën 1 500 € në muaj. Në këtë grup bëjnë pjesë: Spanja dhe Sllovenia. Pagat e tyre minimale kombëtare ishin 1 254 € në Slloveni dhe 1 323 € në Spanjë.

-Grupi 3, me një pagë minimale kombëtare të barabartë ose nën 1 000 € në muaj. Në këtë grup bëjnë pjesë: Qiproja, Polonia, Greqia, Portugalia, Malta, Lituania, Kroacia, Estonia, Çekia, Sllovakia, Rumania, Letonia, Hungaria dhe Bullgaria. Pagat e tyre minimale kombëtare varionin nga 477 € në Bullgari në 1 000 € në Qipro.

Norma mesatare vjetore e rritjes ndërmjet korrikut 2014 dhe korrikut 2024 ishte më e larta në Rumani (+13,7%) e ndjekur nga Lituania (+12,3%), Bullgaria (+10,6%), Polonia (+9,5%) dhe Çekia (+9,3%).

Normat më të ulëta të rritjes mesatare vjetore midis vendeve të BE-së u regjistruan në Francë (+2,0%), Maltë (+2,6%) dhe Luksemburg (+3,0%).

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.