Pacolli: Gërvalla ka fshirë çdo gjë që mund të dëshmojë se në MPJ ka pasur edhe ministra të tjerë para saj

Kryetari i Aleancës Kosova e Re (AKR), Behgjet Pacolli, ka thënë se Ministrja e Punëve të Jashtme, Donika Gërvalla, ka fshirë çdo gjë që mund të dëshmojë se në MPJ ka pasur edhe ministra të tjerë para saj.

Këto komente, Pacolli i ka bërë përmes një postimi në Facebook, ku ka theksuar se nuk ka mbetur asnjë shenjë e biografive, aktiviteteve dhe kohën kur kanë vepruar ministrat tjerë në  këtë dikaster.

“Ky fakt arrogant, aq sa nuk është human e kolegial nuk është as profesional”, ka shkruar ish-kryediplomati i Kosovës.

Mirëpo, Pacolli i ka thënë ministres Gërvalla se pasi që e ka fshirë historikun e tij, do të duhej që të largonte edhe të gjitha komoditetet në ndërtesën e MPJ-së, pasi që ka bërë me dije se të njëjtat janë financuar nga vetë ai.

“Në rastin tim, nëse Gërvalla ka hequr dorë nga fakti që edhe unë isha aty, ajo duhej të kishte  hequr dorë edhe nga të gjitha komoditetet e saj në ambientet e brendshme të ndërtesës së MPJ, duke filluar  nga hyrja e ndërtesës, në zyrën protokolare e deri te zyra e saj, të cilat  janë ndërtuar dhe financuar (me shumë qindra mijëra euro) nga unë privatisht”, ka përfunduar ai.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.