Ozempic – Medikamenti për dobësim ngadalëson edhe plakjen, sipas studimit

Ilaçet për humbje peshe janë gati të revolucionarizojnë kujdesin shëndetësor, duke ngadalësuar procesin e plakjes dhe duke i lejuar njerëzit të jetojnë më gjatë dhe me shëndet më të mirë. Ky është mesazhi dramatik nga shkencëtarë madhorë në fushën e mjekësisë, pasi studimet u prezantuan javën e kaluar në Konferencën e Shoqatës Evropiane të Kardiologjisë në Londër.

Hulumtimet kanë zbuluar tashmë se semaglutide – e njohur edhe me emrat e markave Wegovy dhe Ozempic – ul rrezikun e vdekjes tek njerëzit që ishin obezë ose mbipeshë dhe kishin sëmundje kardiovaskulare.

Por studimet e reja kanë zbuluar se Ozempic ka ndikime përtej asaj që ishte imagjinuar fillimisht për ilaçin. Njerëzit që morën ilaçin vdisnin me një shkallë më të ulët nga të gjitha shkaqet, jo vetëm nga shkaqet kardiovaskulare, zbuluan studiuesit.

“Semaglutide ka përfitime të gjera përtej asaj që kemi imagjinuar fillimisht”, tha Prof Harlan Krumholz i shkollës së mjekësisë Yale. “Nuk është vetëm shmangia e sulmeve në zemër. Këta janë promovues të shëndetit. Nuk do të më befasonte që përmirësimi i shëndetit të njerëzve në këtë mënyrë ngadalëson procesin e plakjes”.

Studimet u prodhuan nga testi Select në SHBA, i cili studioi 17 mijë e 604 njerëz të moshës 45 vjeç e lart, të cilët ishin mbipeshë ose obezë dhe kishin sëmundje kardiovaskulare, por jo diabet. Ata morën semaglutide ose një placebo dhe u gjurmuan për më shumë se tre vjet.

Një total prej 833 pjesëmarrësish vdiqën gjatë studimit, nga të cilët 58% ishin të lidhura me shkaqe kardiovaskulare dhe 42% nga të tjerët, me infeksionet që ishin shkaku më i zakonshëm i vdekjes në këtë grup të fundit.

Më e rëndësishmja, ata që morën semaglutide kishin më pak gjasa të vdisnin nga infeksionet sesa ata në grupin e placebos, ndërkohë që ai gjithashtu uli vazhdimisht rrezikun e rezultateve të pafavorshme kardiovaskulare, u zbulua.

“Reduktimi i fuqishëm i vdekjeve jo-kardiovaskulare, dhe veçanërisht vdekjeve nga infeksionet, ishte befasues”, tha Benjamin Scirica, një profesor i Harvardit dhe autori kryesor i një prej studimeve.

“Këto gjetje përforcojnë se mbipesha dhe obeziteti rrisin rrezikun e vdekjes për shkak të shumë etiologjive të cilat mund të modifikohen me terapi si semaglutide”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.