Osmani udhëton në Zvicër për të marr pjesë në Samitin e Paqes për Ukrainën

Presidentja e Kosovës, Vjosa Osmani, ka udhëtuar për në Zvicër, për të marrë pjesë në Samitin e nivelit të lartë të Paqes për Ukrainën.

Lajmi është bërë i ditur përmes një komunikate të lëshuar nga Zyra e Presidencës.

“Në Samit, i cili do të mbahet më 15 dhe 16 qershor 2024 në Bürgenstock, afër Lucernit, Presidentja Osmani do të jetë krahas presidentit të Ukrainës, Volodymyr Zelenskyy, Presidentes së Zvicrës, Viola Amherd, si dhe afër 100 liderëve e përfaqësuesve të tjerë nga e mbarë bota”, thuhet në komunikatë.

Në këtë samit është thënë se liderët botëror do të diskutojnë për rëndësinë dhe mënyrat e vazhdimit të mbështetjes për Ukrainën.

“Do të përqendrohet edhe në rëndësinë kritike të arritjes së paqes në Ukrainë”.

Osmani është paralajmëruar se do të ketë edhe takime të tjera.

“Përgjatë qëndrimit në Zvicër, presidentja kosovare do të zhvillojë edhe takime bilaterale me liderë të tjerë botëror”.

Në njoftimin e lëshuar është thënë se Osmani do ta riafirmojë përkushtimin e Kosovës për ta vazhduar mbështetjen për Ukrainën deri në fitore si dhe do të flasë për rëndësinë e mbështetjes gjithëpërfshirëse globale për t’u arritur paqe afatgjate dhe e qëndrueshme.

Më 13 qershor, Osmani kishte marrë pjesë në samitin e vendeve të Evropës Juglinore që ishte mbajtur në Shkup.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.