Presidentja e Kosovës, Vjosa Osmani, është takuar këtë të premte me Zëvendësdrejtorin e Shërbimit Evropian për Veprim të Jashtëm, i cili menaxhon Evropën Perëndimore, Ballkanin Perëndimor, Turqinë dhe Mbretërinë e Bashkuar, Marko Makovec, me të cilin kanë diskutuar për sulmin terrorist të 24 shtatorit.

Siç njofton zyra e presidencës, pas aktit të agresionit të Serbisë kundër Kosovës, Osmani vuri theksin tek “rëndësia që Serbia të mbahet përgjegjëse përmes masave konkrete nga Bashkimi Evropian”.

E para vendit ka nënvizuar se parandalimi i përpjekjeve të vazhdueshme të Serbisë “për destabilizim të të gjithë rajonit tonë është kyç”.

“Presidentja theksoi se ky sulm ishte i përgatitur dhe i orkestruar nga Serbia, dhe i ekzekutuar nga grupe terroriste e paramilitare, gjë që e dëshmojnë dëshmitë e shumta të siguruara nga institucionet tona të sigurisë”.

Në njoftimin e bërë nga presidenca thuhet se Osmani riafirmoi përkushtimin e plotë të Kosovës që të punoj ngushtë me partnerët e saj për t’i tejkaluar sfidat e krijuara nga ky akt i agresionit, “duke përmendur bashkëpunimin e vazhdueshëm të institucioneve tona me ato ndërkombëtare e sidomos ato të sigurisë, përfshirë EULEX-in”.

Bislimi e njofton zyrtarin e BE-së për sulmin terrorist: Shpërfaqi objektivat e Serbisë për destabilizim të rajonit

Çka ndodhi?

Një grup i armatosur të dielën e 24 shtatorit, ka sulmuar Policinë e Kosovës në Banjë të Zveçanit, duke lënë të vrarë rreshterin, tanimë heroin Afrim Bunjaku.

Autoritetet e Kosovës kanë akuzuar drejtpërdrejtë Serbinë se qëndron prapa këtij sulmi terrorist, teksa kryekrimineli Milan Radojiçiç – njeri i besuar i presidentit serb Aleksandër Vuçiç – ka marrë përgjegjësinë për këtë sulm.

Radojiçiç u arrestua të martën nga autoritetet serbe, mirëpo i njëjti një ditë më pas është liruar nga paraburgimi.

Vendet perëndimore, përfshirë Shtetet e Bashkuara të Amerikës dhe Bashkimi Evropian e kanë dënuar këtë sulm, derisa kanë kërkuar që përgjegjësit të sillen para drejtësisë.

Nga ana tjetër, Serbia nuk është distancuar nga ky sulm, përkundrazi ka shpallur ditë zie kombëtare, për t’i nderuar kështu terroristët e vrarë.

Përveç kësaj, Beogradi zyrtar, pas sulmit terrorist, dislokoi një numër të madh të trupave ushtarake përgjatë kufirit me Kosovën.

Ky veprim i Serbisë nxiti reagimin e bashkësisë ndërkombëtare, të cilët kërkuan që menjëherë të zvogëlohet numri i trupave ushtarake.

Pas këtyre thirrjeve të qarta të ndërkombëtarëve, Beogradi njoftoi se ka filluar reduktimin e trupave ushtarake përgjatë kufirit me Kosovën.

Zyrtari i BE-së takon përfaqësuesit e Kishës Ortodokse Serbe në Manastirin e Banjës