Osmani takon Odën Ekonomike Amerikane, diskutojnë për promovimin e potencialit ekonomik të Kosovës

Presidentja e Kosovës, Vjosa Osmani, të shtunën ka takuar strukturat drejtuese të Odës Ekonomike Amerikane, ku pjesëmarrës ishin edhe përfaqësues të Ambasadës Amerikane dhe Agjencisë së Shteteve të Bashkuara për Zhvillim Ndërkombëtar e njohur ndryshe si USAID.

Në takim, siç thuhet në një komunikatë për media e lëshuar nga Presidenca, është diskutuar për koordinim në promovimin e potencialeve ekonomike të Kosovës dhe fuqizimin e dialogut publiko-privat.

“Para anëtarëve të Bordit të Guvernatorëve dhe anëtarëve të Këshillit Drejtues të Qendrës së Arbitrazhit të Odës Amerikane, Osmani theksoi rëndësinë e dialogut publiko-privat si proces në të mirë të Kosovës e në shërbim të zhvillimit ekonomik të Kosovës”, potencon komunikata.

Osmani në takim ndër të tjera ka vlerësuar edhe kontributin e Shteteve të Bashkuara të Amerikës në  në fuqizimin ekonomik dhe subjektivitetit ndërkombëtar të Kosovës, përfshirë edhe anëtarësimin në organizata të rëndësishme e konventa ndërkombëtare.

“Në këtë kontekst, Presidentja Osmani tha se Zyra e Presidentes është vazhdimisht e hapur për koordinim të veprimeve për promovim të potencialit ekonomik të Kosovës dhe shprehu mirënjohje për bashkëpunimin me Odën Ekonomike Amerikane”.

Ndryshe Oda Amerikane e Kosovës ka qenë e zëshme për sa i përket deklaratave të krerëve institucional në raport me mundësinë e një sulmi ushtarak nga Serbia.

Kjo Odë ka kërkuar në shumë raste që autoritetet kosovare të mos deklarohen në mënyrë publike për çështje të tilla me pretekstin se këto deklarata trembin investitorët e huaj potencial.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.