Osmani takon këshilltarët e Bidenit për çështje të sigurisë, flasin për rolin jetik të SHBA-së në ruajtjen e paqes

Presidentja e Kosovës, Vjosa Osmani-Sadriu, njoftoi nëpërmjet një postimi në “Facebook” të dielen pasdite se në kuadër të Samitit të Paqes për Ukrainën në Zvicër, takoi këshilltarin për Siguri Kombëtare të Shtëpisë së Bardhë, Jake Sullivan, ku në fokus të diskutimit ka qenë roli ekzistencial i Shteteve të Bashkuara të Amerikës (SHBA) në ruajtjen e paqes dhe sigurisë.

E përveç këshilltarit për për Siguri Kombëtare të presidentit amerikan, Joe Biden, presidentja kosovare takoi edhe drejtorin e Lartë për Evropë në Këshillin për Siguri, Michael Carpenter, i cili është përgjegjës edhe për Ballkanin Perëndimor. Osmani deklaroi se ndër të tjera diskutuan mbi rolin e SHBA-së në siguri dhe për rëndësinë e bashkëpunimit mes dy vendeve.

“Një takim i rëndësishëm me Këshilltarin për Siguri Kombëtare të Presidentit Biden, z. Jake Sullivan, dhe Ambasadorin Michael Carpenter- Drejtor i Lartë për Evropë në Këshillin për Siguri të Shtëpisë së Bardhë, mbi rolin jetik të Shteteve të Bashkuara për paqe dhe siguri të qëndrueshme si dhe për rëndësinë e rritjes së bashkëpunimit tonë”, shkroi presidentja kosovare.

Në kuadër të Samitit për Ukrainën, presidentja Osmani takoi edhe zëvendëspresidenten e SHBA-së, Kamala Harris, të cilës i përcolli mirënjohjen e popullit të Kosovës për “mbështetjen e palëkundur” të SHBA-së ndaj Kosovës dhe “miqësinë e përjetshme” mes Kosovës dhe SHBA-së.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.