Osmani: S’kërkuam që Kosova ta tërheq kontrollin mbi Veriun, është gënjeshtër e madhe

Ministri i Punëve të Jashtme të Maqedonisë së Veriut, Bujar Osmani, pasi njoftoi se nga pozita e kryesuesit të OSBE-së kishte nxjerr planin 9-pikësh për deeskalimin e situatës në pjesën veriore të Kosovës, i cili u publikua më 3 qershor 2023, për të cilin kishte marrë kritika nga Qeveria e Kosovës ka thënë se “ishte gënjeshtër e madhe që kemi kërkuar që Kosova të tërheq kontrollin mbi Veriun”.

“Ne si OSBE kërkuam të krijohej një distancë fizike mes forcave speciale dhe ushtrisë serbe. Ishte gënjeshtër e madhe që ne kemi kërkuar që Kosova të tërheq kontrollin mbi Veriun”.

Duke shtuar se kërkesa e tyre ishte ndryshe.

“Ishte vetëm forcat e armatosura të largohen nga njëra-tjetra, të mos kishin kontakt fizik, sepse mund të krijonte një realitet të ri që ishte në vijë të ndryshimit të kufijve”, tha Osmani në emisionin “Pressing”.

Ndërsa, ka folur edhe për lobimin e tij që shteti i Ukrainës të mos votojë kundër Kosovës në Këshillin e Evropës.

Këtë Osmani, thotë se e kishte bërë duke lidhur komunikim mes Kurtit dhe ministrit të Jashtëm të Ukrainës.

“Unë kam ndërmjetësuar komunikimin ndërmjet Kosovës dhe Ukrainës që Ukraina të mos votojë kundër në Këshillin e Evropës për Kosovën dhe ajo ka qenë një përpjekje e imja t’i lidhë kryeministrin Kurti dhe ministrin e Jashtëm të Ukrainës. Ukraina nuk voton kundër edhe pse nuk e njeh Kosovën”.

“Unë kam lidhur komunikimin ndërmjet Kurtit dhe ministrit të Jashtëm të Ukrainës dhe unë kam bërë lobimin që Ukraina të mos votojë kundër në Këshillin e Europës”.

Më 7 prill, zëdhënësi i Qeverisë së Kosovës, Përparim Kryeziu, deklaroi se deeskalimi i situatës në Veri të territorit nuk ndodhi në bazë të planit 9-pikësh të OSBE-së, ashtu sikurse pretendoi ministri i Punëve të Jashtme të Maqedonisë së Veriut, Bujar Osmani.

Kryeziu, kujtoi se pika 3 sugjeron që për sigurinë në terren, përgjegjëse të bëhet policia e rregullt, nën asistencën e KFOR-it dhe EULEX.

Ai konsideroi se nëqoftëse se nuk do përgjigjej Policia e Kosovës gjatë dhe pas sulmit terrorist në Banjë të Zveçanit – komunë e banuar me shumicë serbe – në veri të Kosovës, atëherë sot do të bëhej fjalë për një realitet tjetër.

“Rendin dhe sigurinë në terren brenda ditës e riktheu Policia Speciale e Kosovës. Po mos të ishte kjo njësi në veri, sot do të njihnim një realitet tjetër pas sulmit terrorist dhe paramilitar të 24 shtatorit në Banjskë”, kishte shkruar Kryeziu.

Një ndër kriteret e përcaktuara nga Bashkimi Evropian (BE) për largimin e sanksioneve ndaj Kosovës të vendosura në qershor për shkak të përshkallëzimit të situatës është shpallja e zgjedhjeve të jashtëzakonshme dhe organizimi në mënyrë gjithëpërfshirëse në të gjitha katër komunat serbe në Veri, kurse nga serbët kërkohet që të marrin pjesë pa kushte.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.