Osmani, presidentit të Portugalisë: Përmbyllja e dialogut me njohje reciproke, e vetmja rrugë për paqe në rajon
![](https://albanianpost.com/wp-content/uploads/2023/11/401559687_883485369802670_1561252266320519464_n.jpg)
Presidentja e Kosovës, Vjosa Osmani, e cila është duke qëndruar për vizitë në Portugali, ka thënë se përmbyllja e procesit të dialogut me njohje reciproke është e vetmja rrugë për paqe afatgjatë në rajon.
Përmes një komunikate të lëshuar nga Zyra e Presidencës, Osmani ka thënë se Kosova është palë konstruktive në këtë proces.
“Presidentja po ashtu potencoi se në procesin e dialogut me Serbinë, Kosova është palë konstruktive dhe se përmbyllja e këtij procesi përmes njohjes së ndërsjellë është e vetmja rrugë që do të sjellë paqe afatgjate në rajon”, thuhet në komunikatën e Presidencës.
Në komunikatë thuhet se në takim Osmani ka folur edhe për sulmin në Banjskë.
“Presidentja Osmani e informoi homologun De Sousa dhe për zhvillimet e fundit në vend, si dhe mbi aktin e agresionit të Serbisë kundër Republikës së Kosovës më 24 shtator, me ç’rast, potencoi rëndësinë e sjelljes para drejtësisë në Kosovë të grupit paramilitar serb dhe adresimin e përgjegjësisë së Serbisë në destabilizimin e Kosovës dhe rajonit”, thuhet në komunikatë.
Në këtë takim thuhet se Osmani dhe De Sousa, kanë diskutuar edhe për mundësitë për thellimin e bashkëpunimit të sfera të interesit të dyanshëm.
“Më tej, Presidentja Osmani ka theksuar se e sheh Portugalinë si një shtet mik brenda Bashkimit Evropian dhe më gjerë, ndaj tha se shpreson në mbështetje të mëtejme për anëtarësimin e Kosovës në organizata ndërkombëtare”.
“Në këtë kontekst Presidentja ka falënderuar Portugalinë për mbështetje në procesin e liberalizimit të vizave dhe për anëtarësimin në Këshillin e Evropës, si dhe ka shfaqur shpresën se Portugalia do të përkrahë edhe dhënien e statusit kandidat në BE për Republikën tonë”.
Presidentja e Kosovës, Vjosa Osmani, këtë të marte, ka udhëtuar në Portugali për një vizitë pune, ka njoftuar Zyra e Presidentes.
Në kuadër të vizitës në Portugali, Osmani dhe kryetari i Lisbonës, Carlo Moedas, do ta përurojnë edhe shtatoren e Nënë Terezës, e vendosur në qendër të kryeqytetit të Portugalisë.
Më 7 tetor të 2008, Qeveria e Portugalisë kishte njohur zyrtarisht shtetin e Kosovës, në atë kohë ishte vendi i 22-të i Bashkimit Evropian që kishte njohur Kosovën.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com-
Mexhiti: Po punojmë çdo ditë që ish ushtari i UÇK-së të lirohet
-
LDK-ja pranon ftesën e Osmanit për diskutimin e datës së zgjedhjeve
-
Elshani për garën e kërcimit në Ujman: Për ne është detyrë, dikush mund ta shoh si provokim
-
KFOR: Kemi patrullime të rregullta në kufirin me Serbinë për siguri dhe stabilitet