Osmani për Luginën e Preshevës: Do të përpiqem që zëri juaj të dëgjohet

Presidentja e Republikës së Kosovës, Vjosa Osmani është zotuar që shteti i Kosovës do t’i paraqesë në instancat më të larta ndërkombëtare problemet e shqiptarëve të Luginës së Preshevës.

Këtë zotim ajo e ka bërë gjatë takimit me delegacionin e Këshillit Kombëtar Shqiptar për Luginën e Preshevës, të përbërë nga kryetari i këshillit, Ragmi Mustafa, Lirona Zuka dhe Alban Alili.

“E keni mbështetjen time dhe ju siguroj se do të përpiqem që zëri juaj të dëgjohet”.

“Qytetarët e Luginës së Preshevës janë brengë e jona e përhershme, dhe do të ndërmarrim çdo veprim të mundshëm për t`i ndihmuar sa më shumë”, ka thënë presidentja Osmani.

Departamenti i informacionit i presidencës së Kosovës në njoftim tutje thotë se Presidentja ka shprehur gatishmëri për ta mbështetur këtë Këshill, duke shtuar se në vazhdimësi angazhohet për promovimin e të drejtave të shqiptarëve në Preshevë, Medvegjë e Bujanovc.

Presidentja thuhet se ka adresuar problemet me të cilat ballafaqohen qytetarët e Luginës, siç janë pasivizimi i adresave, mosnjohja e diplomave nga Serbia dhe problemet e vazhdueshme me punësimin, thuhet ndër të tjera në njoftim.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.