Osmani pasi pritet nga Zelenskyy në Zvicër: Jemi për të dhënë mbështetje për lirinë e Ukrainës

Presidentja e Kosovës, Vjosa Osmani, e cila është duke marrë pjesë në Samitin e Paqes për Ukrainën, që është duke u mbajtur në Zvicër, ka thënë se është atje për të dhënë mbështetjen e shtetit që ajo udhëheqë për Kievin zyrtar.

Këto komente, Osmani i ka bërë përmes një postimi në platformën X, pasi që është pritur para fillimit të këtij samiti nga presidentja zvicerane, Viola Amherd dhe Presidenti i Ukrainës, Volodymir Zelenskyy.

“Në Zvicër, me Presidentin zviceran Viola Apamherd, Presidentin ukrainas Zelenskyy dhe liderë të tjerë nga e gjithë bota. Ne jemi këtu për të ripërkushtuar mbështetjen tonë për lirinë e Ukrainës!”, shkroi e para e vendit.

In Switzerland, with Swiss President @Violapamherd, Ukrainian President @ZelenskyyUa, and other fellow leaders from across the world.

We're here to recommit our support for Ukraine's freedom! 🇽🇰🇨🇭🇺🇦 #PathToPeace #UAPeaceSummit pic.twitter.com/cfCj1zYA6V

— Vjosa Osmani (@VjosaOsmaniPRKS) June 15, 2024

Osmani, në Zvicër, është takuar të shtunën edhe me homologen e saj nga Malta, Myriam Spiteri Debono, të cilës i ka shprehu mirënjohjen për mbështetjen e vazhdueshme që Malta ia jep Kosovës.

“Malta është një vend vërtet mik, andaj i shpreha mirënjohjen e thellë Presidentes Spiteri Debono për mbështetjen e vazhdueshme që vendi i saj i ka dhënë Republikës tonë”, shkroi e para vendit.

Presidentja, e cila po përfaqëson vendin në Samitin e Paqes për Ukrainën, gjatë ditës, përmes një video-adresimi në Facebook, ka thënë se në këtë iniciativë do të tregojë tregimin se si Kosova është ndërtuar nga zeroja.

“Si një shtet që ka vuajtur shumë, si një shtet që ka sakrifikuar shumë, megjithatë jemi shndërruar në një model të demokracisë”, ka thënë ajo.

Osmani, ndërsa ka potencuar se ky samit ka një rëndësi të jashtëzakonshëm, ka vlerësuar se në këtë iniciativë nuk mjafton që thjesht paqja “të shihet si një koncept i izoluar”.

“Paqja në masë të madhe varet edhe nga drejtësia, drejtësia për viktimat, për ata që kanë vuajtur më së shumti gjatë luftës. Si Kosovë ne i bashkohemi thirrjeve të të gjithë atyre të cilët shtyjnë përpara konceptin e paqes së drejtë, pra paqes së ndërlidhur me drejtësinë për viktimat që kanë vuajtur gjatë luftës”, ka shtuar ajo.

Ndërkaq, gjatë qëndrimit në Zvicër në kuadër të margjinave të Samitit të Paqes për Ukrainën, ka njoftuar se të shtunën ka takuar presidentin e Malit të Zi, Jakov Milatoviç, me të cilën ka biseduar për koordinimin në mbrojtjen e paqes.

“Në kuadër të Samitit të Paqës për Ukrainën, me Presidentin e Malit të Zi, Jakov Milatović diskutuam për rëndësinë e aleancave dhe koordinimit në mbrojtje të demokracisë dhe paqes”, ka njoftuar presidentja.

Ndërsa, të premten, presidentja është takuar edhe me nikoqiren e këtij Samiti, presidenten e Zvicrës, Viola Amherd.

“Në prag të Samitit, ishte kënaqësi të diskutojmë për mundësitë e pafundta të thellimit të bashkëpunimit, me ç’rast roli i mërgatës sonë në forcimin e partneritetit në mes të dy vendeve tona është i pazëvendësueshëm”, shkroi Osmani pas takimit.

Osmani falënderoi Amherd për përkrahjen e vazhdueshme ndaj Kosovës.

“Kosova është përherë mirënjohëse për mbështetjen e fortë të Zvicrës përgjatë çdo etape”.

Në këtë samit liderët botëror do të diskutojnë për rëndësinë dhe mënyrat e vazhdimit të mbështetjes për Ukrainën.

Osmani gjatë samitit pritet ta riafirmojë përkushtimin e Kosovës për ta vazhduar mbështetjen për Ukrainën deri në fitore si dhe do të flasë për rëndësinë e mbështetjes gjithëpërfshirëse globale për t’u arritur paqe afatgjate dhe e qëndrueshme.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.