Osmani pas takimit me Begajn: Kosova dhe Shqipëria, bashkë në ditë të vështira dhe të mira
![](https://albanianpost.com/wp-content/uploads/2024/06/448099318_1001445464673326_3900418312728622485_n.jpg)
Presidentja e Kosovës, Vjosa Osmani, ka zhvilluar takim me presidentin e Shqipërisë, Bajram Begaj, të mërkurën e 12 qershorit për nder të Ditës së Çlirimit.
Pas takimit, Osmani përmes disa fotografive të publikuara ka shkruar “Kosova dhe Shqipëria, bashkë në ditë të vështira dhe ditë të mira”.
Begaj, është duke qëndruar në vizitë dy ditore në Prishtinë.
Osmani, në mëngjesin e së hënës përmes një video përmbledhëse për Ditën e Çlirimit, ka shprehur mirënjohje ndaj vizionarëve, dëshmorëve, martirëve dhe aleatëve të lirisë.
Videoja nis me deklaratën e ish-presidentit amerikan, Bill Clinton, për nisjen e bombardimeve për çlirimin e Kosovës.
Aty përfshihen edhe pamje të ish-kryeministrit britanik, Tony Blair, dhe vazhdon me deklaratën e ish-presidentit Ibrahim Rugova e kryekomandantit, Adem Jashari.
Sot bëhen 25 vjet nga çlirimi i Kosovës – atëherë kur tankset britanike “Challenger” në rrugë tokësore dhe “Apache-t” amerikanë përmbi qiell, në kuadër të trupave paqeruajtëse të NATO-s, filluan marshimin në Kosovë.
Në këtë 25-vjetor, janë paraparë disa ceremoni, ndër të cilat edhe parakalimi i Forcës së Sigurisë dhe Policisë së Kosovës në sheshin qendror të Prishtinës. Nga ora 09:15, presidentja e Kosovës, Vjosa Osmani, do ta presë në takim presidentin e Shqipërisë, Bajram Begaj, ndërsa Kuvendi i Kosovës, në orën 10:00, do të nisë seancë solemne për 25-vjetorin e Ditës së Çlirimit.
Parakalimi i Forcës së Sigurisë dhe Policisë së Kosovës do të nisë në orën 12:00 nga objekti i Qeverisë së Kosovës në sheshin “Ibrahim Rugova” deri te sheshi “Zahir Pajaziti” në kryeqytet, ndërsa pritet të ekspozohen automjete ushtarake, pajisje e sisteme të ndryshme të armatimit.
Në orën 14:00 në Ferizaj do të zbulohet shtatorja e kryeministrit të atëhershëm britanik, Tony Blair, i cili për shqiptarët e Kosovës është më shumë se një ish-kryeministër i Britanisë së Madhe – ai është një prej heronjve të luftës së Kosovës dhe bombardimeve të NATO-s ndaj Serbisë.
Gjithashtu, tre krerët e shtetit – presidentja, kryeministri dhe kryeparlamentari – do të kenë pritje shtetërore për nder të 25-vjetorit të lirisë. Kjo ceremoni pritet të nisë në orën 17:00, ndërsa nga ora 18:00 në sheshin “Zahir Pajaziti” në qendër të kryeqytetit do të ketë koncert festiv.
Ndryshe, megjithëse festohet 25 vjetori i çlirimit, kjo ditë nuk është festë zyrtare në Kosovë. Ligji për festat zyrtare, 12 qershorin e njeh vetëm si ditë memoriale, madje nuk e njeh as si ditë të lirisë apo çlirimit – kur nisi largimi i çizmes së fundit të ushtarëve jugosllavë nga Kosova – por si ditë të paqes.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com