Osmani njofton për takimin me Presidentin e Bullgarisë, s’e përmend kërkesën e tij për “afirmimin e komunitetit bullgar” në Kosovë

Presidentja e Kosovës, Vjosa Osmani, ka njoftuar për takimin me homologun e saj bullgar, Rumen Radev, por në njoftimin e bërë në Facebook, nuk e ka përmendur fare kërkesën e këtij të fundit për “afirmimin e komunitetit bullgar” në Kosovë.

E para vendit, shkroi se gjatë takimit që ka pasur me Radev-in në Mbretërinë e Bashkuar, e ka falënderuar për mbështetjen e palëkundur të Bullgarisë për të ardhmen euroatlantike të Kosovës.

“Diskutuam raportet tona të shkëlqyeshme bilaterale, si dhe rëndësinë e anëtarësimit të Kosovës në KiE, BE, NATO dhe organizata të tjera ndërkombëtare”, shkroi presidentja.

Ndërsa, kur presidenca bullgare njoftoi për këtë takim, dy ditë më parë, u tha se Radev ka kërkuar nga Osmani afirmim të statusit për komunitetin bullgar në Kosovë.

Ky takim kishte ndodhur para fillimit të Samitit të Komunitetit Politik Evropian, që u mbajt në Londër.

Siç ka njoftuar presidenca bullgare, Radev ka theksuar se përshpejtimi i procesit të integrimit të Kosovës në strukturat ndërkombëtare, komunitetit evropian dhe euroatlantik do të jetë një shenjë pozitive për të gjithë rajonin.

“Të dy theksuan dialogun e shkëlqyer politik si faktor për zhvillimin e gjithanshëm të marrëdhënieve mes Bullgarisë dhe Kosovës”, citohen të kenë thënë dy krerët e shteteve respektive.

Kreu i shtetit bullgar vlerësoi lartë rezultatet e vizitës së tij zyrtare në Kosovë në dhjetor të vitit të kaluar, gjatë së cilës u diskutuan një varg temash nga agjenda e bashkëpunimit dypalësh në ekonomi, investime, arsim dhe siguri, si dhe takimet e tyre me përfaqësuesit e komunitetit bullgar në vend.

“Në këtë drejtim, presidenti Radev shprehu vlerësimin e tij për qasjen e Kosovës ndaj komuniteteve në përputhje me standardet demokratike evropiane”, theksohet në njoftim.

Aty potencohet se qëndrimi i përgjithshëm ishte se garantimi i së drejtës për vetëvendosje është një nga themelet e demokracisë.

“Rumen Radev shprehu shpresën se procesi i konfirmimit të statusit dhe mundësive për realizimin e plotë të të drejtave të komunitetit bullgar në vend dhe zhvillimi i tij do të vazhdojë si një faktor real për forcimin e mëvonshëm të marrëdhënieve ndërmjet dy vendeve”, thuhet tutje.

Kjo nuk është hera e parë që autoritetet bullgare u kanë paraqitur udhëheqësve kosovarë kërkesën për pranimin zyrtar të komunitetit bullgar në Kosovë.

Madje, një kërkesë të tillë e kishte paraqitur presidenti bullgar në një konferencë për media që kishte pasur me presidenten Osmani në Prishtinë, në dhjetor të vitit të kaluar.

Nga ana tjetër, deri më tani, udhëheqësit e Kosovës nuk kanë reaguar për këtë çështje.

Së fundmi, “Radio Evropa e Lirë” ka raportuar se si Bullgaria është duke u përpjekur për ta krijuar komunitetin bullgar në Kosovë.

Presidenti i Bullgarisë kërkon afirmim të statusit të bullgarëve në Kosovë

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.