Osmani në New York: Kosova shquhet për lidership të grave në politikë

Presidentja e Kosovës, Vjosa Osmani e cila është duke qëndruar në New York, ku është duke u mbajtur Sesioni i 78 i Asamblesë së Kombeve të Bashkuar, ka marrë pjesë në një ceremoni në të cilën është shënuar 10 vjetori i grave liderë në politikë.

Përmes një komunikate dërguar mediave është thënë se e para e shtetit ka folur për angazhimin dhe rolin e shquar të grave të Kosovës në epoka të ndryshme të historisë së zhvillimit të vendit.

“Ajo theksoi se Kosova, në 15 vjetët e pavarësisë së saj, shquhet për lidership të grave në politikë, teksa potencoi rëndësinë e bashkëpunimit dhe rrjetëzimit të vazhdueshëm me qëllim të fuqizimit të grave në jetën publike”, ka thënë Osmani.

Sipas saj, Kosova aktualisht është duke dëshmuar si vend lider në udhëheqjen e grave.

“Presidentja Osmani në adresimin e saj, theksoi se Kosova po dëshmohet si vend lider në udhëheqjen e Agjendës për Gratë, Paqen dhe Sigurinë dhe potencoi se fuqizimi i grave në fushën e sigurisë, si dhe në fusha të tjera, është mundësia më e mirë për ta avancuar shoqërinë në tërësi”.

Presidentja e Kosovës, Vjosa Osmani, ka udhëtuar për në New York, ku në kuadër të sesionit të 78-të të Asamblesë së Kombeve të Bashkuara do të zhvillojë takime me liderë botërorë dhe organizata ndërkombëtare.

Sipas njoftimit për media të zyrës së Osmanit, presidentja është ftuar së bashku me Zotërinë e Parë, Prindon Sadriu, që të marrin pjesë në pritjen zyrtare të organizuar nga presidenti i SHBA-ve, Joe Biden.

Ndërkaq, Zotëria i Parë, gjithashtu është ftuar të marrë pjesë në një pritje të veçantë, të organizuar nga Zonja e Parë e SHBA-ve, Jill Biden.

Ajo po ashtu do të marrë pjesë edhe në aktivitete e diskutime të shumta të organizuara nga shtetet aleate.

Përveç takimeve, presidentja do të mbajë diskutime në disa nga universitetet dhe institucionet më prestigjioze në SHBA.

Sipas njoftimit, në agjendën e Osmanit do të jenë edhe një sërë aktivitetesh të përbashkëta me mërgatën shqiptare në Amerikë si dhe disa nga shoqatat të cilat e zhvillojnë aktivitet në SHBA.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.