Osmani në Maltë, falënderon homologun e saj për ndihmën ndaj Kosovës

Presidentja e Kosovës, Vjosa Osmani, e cila është për një vizitë zyrtare në Maltë, të mërkurën e dy marsit është pritur nga homologu i saj, George Vella, të cilin e ka falënderuar për mbështetjen e Kosovës në drejtimin e anëtarësimit në Bashkimit Evropian.

“Në ditën e parë të qëndrimit në Maltë, u prita nga Presidenti i Republikës së Maltës, Dr. George Vella, të cilin e falënderova për mbështetjen që ky vend i ka dhënë Kosovës që nga shpallja e pavarësisë dhe vazhdon ta bëjë këtë edhe tani në drejtim të anëtarësimit tonë në Bashkimin Evropian dhe në organizata ndërkombëtare”, ka shkruar Osmani, në rrjetin e saj social në Facebook.

Ndryshe, Osmani një ditë më parë u prit me nderime të larta nga Presidenti i Turqisë, Recep Tayyip Erdogan, gjatë vizitës së saj zyrtare në Turqi.

Osmani, pas takimit privat me presidentin turk, në një konferencë për media, kishte kërkuar mbështetjen e Turqisë për anëtarësimin e Kosovës në NATO.

Në anën tjetër, Erdogan, ka potencuar se vendi i tij nuk ka asnjë problem në raport me anëtarësimin e Kosovës në NATO.

“Ne si vend i rëndësishëm në NATO nuk shohim asgjë që nuk shkon sa i përket anëtarësimit të Kosovës në këtë aleancë, ne e mbështesim këtë proces. Do të ndërmarrim hapat tona, siç ndihmuam në procesin e njohjeve do të bëjmë njëjtë edhe në procesin e anëtarësimit të Kosovës në NATO”, kishte pohuar Erdogan.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.