Osmani ndan urdhrin “Hero i Kosovës” për policin Afrim Bunjaku

Presidentja e Kosovës, Vjosa Osmani në mbledhjen komertative për nder të policit, Afrim Bunjaku, i cili u vra në fshatin Banjskë në Veri të Kosovës, nga bandat kriminale të Serbisë ka ndarë Post-Mortem, urdhrin me të lartë të Republikës ‘hero i Kosovës’ të cilin e pranuan familjarët e policit Bunjaku.

Osmani, në fjalimin e saj është shprehur se Kosova ka edhe një hero i cili përkushtimin dhe profesionalizimin ia dedikoi mbrojtjes së Republikës së Kosovës.

“Jemi mbledhur në këtë ceremoni për t’ia dhënë lamtumirën e fundit policit tonë rreshterit tonë Afrim Bunjaku, i cili deri dje ishte gardian i sigurisë sonë, ndërkaq prej sot është hero i Kosovës. Ai ra në mbrojtje të rendit, ligjit, integritetit territorial dhe sovranitetit të Kosovës”.

“Sot në emër të qytetarëve të Republikës së Kosovës do t’i ndajë Post-Mortem, urdhrin më të lartë të Republikës, urdhrin ‘hero të Kosovës”, ka thënë Osmani.

“Shteti ynë nga sot ka edhe një hero, ka edhe një kujtim më shumë për një njëri që me profesionalizëm e përkushtim iu dedikua mbrojtjes së Republikës për të cilën ra në krye të detyrës”.

E para e shtetit e përshkroi jetën e një oficeri të policisë, duke thënë se është “jetë e shërbimit e sakrificës dhe guximit”.

“Jeta e një oficeri polici është jetë e shërbimit e sakrificës dhe guximit. Afrim Bunjaku, sikurse edhe të gjithë pjestarët e tjerë të Policisë së Kosovës, dje u sfiduan nga bandat terroriste të dirigjuara nga Beogradi dhe bën atë që duhet rikthyen ligjin, mbrojtjen integritetin territorial dhe sovranitetin dhe vunë në vend dinjitetin”.

Edhe kryeministri i Kosovës, Albin Kurti, në fjalimin e tij e ka vlerësuar lartë kontributin e rreshterit Afrimi Bunjaku, duke thënë se sulmet kanë ardhur nga një grup personash të armatosur rëndë që janë trajnuar profesionalisht dhe me plan.

“Me veprimet profesionale dhe të guximshme të Policisë, dje e pamundësuam një skenar ë të gjerë kriminal e terrorist. Afrim Bunjaku u vra gjatë një sulmi ndaj Policisë së Kosovës dhe ndaj vetë shtetit tonë nga një grup personash shumë të armatosur dhe të pajisur rëndë, të trajnuar profesionalisht dhe me plan, të financuar materialisht dhe të mbështetur nga Serbia”.

“Reagimi profesional i Policisë sonë rezultoi me eliminimin e disa terroristëve e kriminelëve, arrestimin e disa të tjerëve dhe neutralizimin e gjithë grupit të tyre, si dhe konfiskimin e gjithë armatimeve dhe mjeteve të tjera logjistike”, ka thënë Kurti.

Ai ka theksuar se sot është dita kur duhet t’i bëhen nderimet më të larta shtetërore policit Afrim Bunjaku.

“Faktet dolën sheshazi përball nesh, në sy tanë dhe të bashkësisë ndërkombëtare dhe në sytë e secilit që ka kurajo dhe vullnet për të parë të vërtetën e rajonit në të cilin jetojmë”.

Të dielën e 25 shtatorit, një pjesëtar i Policisë së Kosovës u vra, një u plagos dhe një tjetër u lëndua, pas një sulmi terrorist nga persona të armatosur në Banjskë të Zveçanit, rreth orës 3 të mëngjesit të së dielës.

Organet e rendit konfirmuan se tre sulmues janë vrarë dhe gjashtë të tjerë janë arrestuar, dy prej tyre të uniformuar dhe katër të tjerë që ndihmonin në operacion përmes radiolidhjeve.

Derisa pjesëtarët e tjerë të grupit terrorist dyshohet se janë arratisur duke kaluar në territorin e Serbisë.

Policia e Kosovës është duke vazhduar operacionin edhe gjatë së hënës.

Sipas informacioneve të fundit, Policia ka gjetur prova të reja, pajisje e materiale që janë konfiskuar në orët e fundit nga vendi i ngjarjes në të cilin për orë të tëra gjatë ditës së djeshme pati shkëmbime me armë zjarri.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.