Osmani – Kerry, diskutojnë për nevojën e anëtarësimit të Kosovës në NATO

Presidentja e Republikës së Kosovës, Vjosa Osmani, është takuar me ish Sekretarin e Shtetit dhe tani i Dërguar i Posaçëm Presidencial i Shteteve të Bashkuara për çështje klimatike, John Kerry, ku kanë diskutuar për nevojën për anëtarësim të Kosovës në Aleancën Veri Atlantike, NATO.

Presidentja Osmani ka thënë se anëtarësimi i Kosovës në NATO është garanca më e mirë për paqe dhe stabilitet në rajonin e Ballkanit Perëndimor.

“Ajo ka vlerësuar përkrahjen e vazhdueshme të SHBA-ve për fuqizimin e rolit të Kosovës në arenën ndërkombëtare, duke potencuar se tani është edhe më e rëndësishme që të rritet përkrahja në procesin e njohjeve dhe anëtarësimeve në organizata ndërkombëtare”, thuhet në njoftim të Presidencës së Kosovës.

Osmani dhe Kerry thuhet se kanë diskutuar edhe për zhvillimet në Evropë dhe rajon si rezultat i agresionit rus në Ukrainë, duke shtuar se Kosova është krah popullit ukrainas dhe po bënë përpjekje për t’i dalë në ndihmë.

Tutje në njoftim thuhet se Osmani ka thënë se pavarësisht politikave vendore dhe globale, ndryshimet klimatike nuk do të ndalojnë së ndodhuri dhe se kjo është një nga sfidat më serioze të kohës sonë.

“Të flasim për ndryshimet klimatike nuk është temë luksoze, por ekzistenciale për të siguruar jetën e fëmijëve tanë”.

“Kosova nuk është imune ndaj efekteve të ndryshimeve klimatike. Andaj, Kosova me të drejtë kërkon të jetë pjesë e nismave globale për luftimin e ndryshimeve klimatike”, ka thënë ajo gjatë takimit me ish Sekretarin e Shtetit, Kerry në margjinat e Forumit në Doha të Katarit.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.