Osmani kërkon nga presidentja e Zvicrës thellim të bashkëpunimit dhe forcim të partneritetit

Presidentja e Kosovës, Vjosa Osmani, gjatë vizitës së saj zyrtare në Zvicër ku do të marrë pjesë në Samitin e Paqës për Ukrainën është takuar me presidenten e Zvicrës, Viola Amherd, nga e cila ka kërkuar thellim të bashkëpunimit mes dy vendeve.

“Në prag të Samitit, ishte kënaqësi të diskutojmë për mundësitë e pafundta të thellimit të bashkëpunimit, me ç’rast roli i mërgatës sonë në forcimin e partneritetit në mes të dy vendeve tona është i pazëvendësueshëm”, thuhet në shkrimin e Osmanit në rrjetin social ‘Facebook’.

Osmani e ka falënderuar Amherd për përkrahjen e vazhdueshme ndaj Kosovës.

“Kosova është përherë mirënjohëse për mbështetjen e fortë të Zvicrës përgjatë çdo etape”.

Osmani, ka udhëtuar për në Zvicër, të premten për të marrë pjesë në Samitin e nivelit të lartë të Paqes për Ukrainën.

Në këtë samit është thënë se liderët botëror do të diskutojnë për rëndësinë dhe mënyrat e vazhdimit të mbështetjes për Ukrainën.

“Do të përqendrohet edhe në rëndësinë kritike të arritjes së paqes në Ukrainë”.

Osmani është paralajmëruar se do të ketë edhe takime të tjera.

“Përgjatë qëndrimit në Zvicër, presidentja kosovare do të zhvillojë edhe takime bilaterale me liderë të tjerë botëror”.

Në njoftimin e lëshuar është thënë se Osmani do ta riafirmojë përkushtimin e Kosovës për ta vazhduar mbështetjen për Ukrainën deri në fitore si dhe do të flasë për rëndësinë e mbështetjes gjithëpërfshirëse globale për t’u arritur paqe afatgjate dhe e qëndrueshme.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.