Presidentja e Kosovës, Vjosa Osmani, gjatë një prononcim për media ka bërë të ditur se i ka shkruar presidentit amerikan për çështjen e anëtarësimit të Kosovës në NATO, me ç’rast ka kërkuar nga ai që anëtarësimi i Kosovës në Aleancën Veri-Atlantike të shihet nga prizmi i sigurisë e jo vetëm nga kriteret politike.
Kjo për të vetmen arsye, shkaku i zhvillimeve të fundit sidomos pas invazionit rus në Ukrainë.
“Prandaj unë i kam shkruar edhe presidentit të SHBA-ve rreth kësaj çështje dhe kam komunikuar edhe me shtetet e tjera duke pas parasysh që Kosova është shteti më pro-NATO në botë dhe që anëtarësimi i të gjitha shteteve të kësaj pjese të Evropës në NATO do të nënkuptonte më shumë siguri, stabilitet dhe rrjedhimisht do të kishte më pak jo stabilitet në rajonin tonë”, ka thënë Osmani.
Sa i përket aplikimit për në Këshillin e Evropës, Osmani ka potencuar se është prioritet mbi prioritetet e saj e për çka janë duke punuar me Ministrinë e Punëve të Jashtme dhe Diasporës rreth kësaj teme.
“Jemi duke punuar shumë afër me Ministrinë e Punëve të Jashtme e cila ka përgatitur strategjinë dhe mënyrën si shkon procedura qe fillimisht të dërgohet aplikacioni, pastaj Këshilli i Evropës të emëron të deleguar që të vijnë në Kosovë për ta vlerësuar plotësimin e kritereve në fushat e ndryshme”, tha ajo.
Osmani, ka komentuar edhe çështjen e votimit të serbëve të Kosovës në zgjedhjet e 3 prillit në Serbi, duke thënë se e domosdoshme është respektimi i sovranitetit të Kosovës.
“Ne duhet ta bëjmë dallimi mes të drejtës së serbëve dhe atyre që kanë dy shtetësi për të marr pjesë në zgjedhje dhe të drejtës së Serbisë për të organizuar zgjedhje në Kosovë. Këto janë dy çështje të ndryshme. Kam insistuar që të respektohet parimi i reciprocitetit sepse çdo e drejtë që i njihet serbeve që jetojnë në Kosovë duhet t’iu njihet edhe shqiptarëve që jetojnë në Preshevë, Medvegjë dhe Bujanoc”, ka shtuar Osmani.
/Albanianpost.com
