Osmani i kërkon BE-së liberalizim të vizave për Kosovën

Presidentja e Kosovës, Vjosa Osmani, në takim me shoqatën e miqësisë Kosovë-Austri, të udhëhequr nga eurodeputeti Lukas Mandl, ka theksuar se Kosova tashmë i ka plotësuar të gjitha kriteret për liberalizim vizash, ndaj ka kërkuar nga BE-ja që t’i përmbahet premtimit për kosovarët.

Më tej, Osmani ka shfaqur bindjen se Austria do të vazhdojë t`i qëndrojë në krah Kosovës, edhe në procesin e integrimit evropian, sikurse edhe në atë të integrimit euro-atlantik.

“Republika e Kosovës ka potencial të jashtëzakonshëm të të rinjve, të cilët janë të shkolluar dhe të aftë për t`i dëshmuar vlerat e tyre sapo t`u jepet mundësia. Duhet të sigurojmë mobilitet dhe të ndërtojmë partneritet të fuqishëm”, ka theksuar Presidentja Osmani në takim me Grupin e Miqësisë Kosovë-Austri.

“Diaspora jonë këtu ka rol qenësor për Republikën e Kosovës, shkaku i potencialit, dijes dhe ideve të reja që sjellin”, është shprehur Osmani.

Osmani ka takuar edhe një grup të grave në Austri, nën organizimin dhe me ftesë të Zonjës së Parë të Austrisë, Doris Schmidauer, në të cilin mori pjesë edhe ish-raportuesja e Parlamentit Evropian për Kosovë, Ulrike Lunacek.

Gjatë këtij takimi u diskutua për rolin e grave në sjelljen e një ndryshimi të rëndësishëm politik, gjithashtu Osmani shprehu nevojën për investime në arsim dhe kujdes shëndetësor për të mundësuar dhe fuqizuar gratë që të jenë të barabarta në tregun e punës, si dhe nevojën për të krijuar më shumë vende pune për të rinjtë dhe gratë.

Për tri vjet rresht, liberalizimi i vizave për Kosovën ishte kushtëzuar nga BE-ja me ratifikimin e Marrëveshjes së demarkacionit ndërmjet Kosovës dhe Malit të Zi.

Por, edhe pse Kuvendi i Kosovës, ndonëse me tri vjet vonesë arriti ta ratifikonte demarkacionin, BE-ja më pas nuk arriti konsensusin e brendshëm për t’ua hequr vizat qytetarëve të Kosovës.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.