Osmani e Lajçak diskutojnë për përshpejtimin e procesit të anëtarësimit të RMV-së në BE

Ministri i Punëve të Jashtme të Maqedonisë së Veriut, Bujar Osmani, këtë të martë është takuar me deleguarin e Bashkimit Evropian për Dialogun dhe njëkohësisht për Ballkanin Perëndimor, Miroslav Lajçak.

Takimin në fjalë e ka njoftuar vetë Osmani përmes një postimi në platformën sociale, Facebook, ndërsa ka potencuar se me diplomatin sllovak ka diskutuar për mbështetjen e Unionit për të përshpejtuar procesin e integrimit evropian të Maqedonisë së Veriut.

Integrimi i Maqedonisë së Veriut në BE, sipas Osmani, është investim për një Evropë më të sigurte dhe të qëndrueshëm.

“Mundësi e mirë për të shkëmbyer mendime mbi konstelacionet aktuale gjeopolitike dhe mbështetjen e nevojshme nga BE-ja për të përshpejtuar procesin e integrimit evropian, si investim në një kontinent evropian të sigurt dhe të qëndrueshëm”, ka shkruar Osmani.

Ndryshe Lajçak ditë më parë ishte takuar me Dobrica Veselinoviç, një nga liderët e partisë opozitare Fronti i të Majtëve të Gjelbër, pjesë e koalicionit opozitar “Serbia Kundër Dhunës” që në zgjedhjet e fundit në Serbi doli grupi i dytë politik me 23.66 për qind të votave.

Por, rezultat ky që koalicioni (SPN) nuk e pranon, pasi konteston fitoren e Partisë Progresiste të Serbisë, udhëhequr nga Aleksandër Vuçiç, që doli e para me 46.75 për qind të votës së përgjithshme elektorale.

Kjo është ndër herët e rralla që Lajçak takohet me një lider opozitar serb për të diskutuar rreth dialogut me Kosovën dhe normalizimin e raporteve.

“Takim me përfaqësues të partisë opozitare serbe Fronti i të Majtëve të Gjelbër për një bisedë të sinqertë rreth dialogut dhe normalizimit të raporteve me Kosovën”, shkroi Lajçak.

Ai shtoi se “gjithashtu, kemi folur për zgjedhjet në Serbi, çka pas tyre dhe zhvillimet e fundit në Serbi”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.