Osmani e Kurti i urojnë besimtarët në ditën e Kurban Bajramit: U shtoftë solidariteti ndër ne

Presidentja e Kosovës, Vjosa Osmani, ka uruar festën e Kurban Bajramit. Ajo ka thënë se në këtë ditë shpërfaqet “tradita jonë dhe shpirti solidar”.

“Uroj që festa e Kurban Bajramit të sjellë gëzim, paqe dhe begati në familjet tuaja! Kjo festë bashkon njerëzit, ndaj në këtë ditë hapen jo vetëm dyert, por edhe zemrat për ta shpërfaqur traditën tonë, si dhe shpirtin solidar për të ndarë diçka nga vetja për ata që kanë nevojë”, thuhet në urimin e Osmanit.

“Kurban Bajrami është festë e sakrificës, mundësi për reflektim, dhembshuri dhe mirënjohje. Shtëpitë tuaja në këtë ditë feste qofshin të mbushura me gëzim, dashuri, mirëkuptim dhe tolerancë.  Urime dhe gëzuar festa e Kurban Bajramit”, shtoi Osmani.

Ndërkaq kryeministri i Kosovës, Albin Kurti, në urimin e tij për festën e Kurban Bajramit, ka bërë thirrje të jemi më zemërgjerë e po ashtu për më tepër solidaritet.

“Me fat Bajrami! Gëzuar kjo festë që është edhe kujtesë për vlerat e sakrificës dhe devotshmërisë. Për të qenë falënderues për bekimet tona dhe për t’i ndarë me ata që kanë më shumë nevojë.  Për më shumë mirësi ndaj njëri-tjetrit, bujari e kujdes për të gjithë, e përbashkim rreth thirrjes për vepra të mira”, theksoi Kurti.

Ai ka shtuar se me zemra të hapura dhe duar të zgjatura njëri-tjetrit, në këtë Kurban Bajram, “le të ndajmë gëzimin me të gjithë ata që na rrethojnë”.

“Le të jemi zemërgjerë, jo vetëm me të mirat materiale, por edhe me kohën, dashurinë dhe mbështetjen tonë. U shtoftë solidariteti ndër ne. Sakrifica e dëlirë u bëftë shpërblim për më të mirën në ne”.

Ndryshe, manifestimi qendror në Kosovë kushtuar Kurban Bajramit, u mbajt në Xhaminë e Madhe në Prishtinë.

Myftiu i Kosovës, Naim Tërnava, tha se shprehja e atdhedashurisë në lutjet e përditshme është një ndjenjë e natyrshme sepse është një dhuratë e pashtershme.

“Është detyrë që të bëhemi qytetarë të një vendi që jetojmë me dinjitet e për t’u bërë të tillë kërkohet që të jemi bashkë duke promovuar atë në të gjitha fushat dhe në çdo vend”, tha Tërnava.

Ai ka shtuar se Kurban Bajrami është një rast i mirë për t’iu afruar Zotit me vepra tona të mira, për ta falënderuar atë për bekimin e tij, për të pastruar shpirtin dhe zemrën.

“Këtë e arrijmë duke kryer vepra të mira, duke zgjatur dorën për të varfëritë dhe nevojtaret“.

Dita e Kurban Bajramit bie në ditën e dhjetë në muajin e fundit (dymbëdhjetë) të Kalendarit Hënor Islam “Dhu-al-Hixhah”.

Në varësi të vendit, festimet e Kurban Bajramit mund të zgjasin diku midis dy dhe katër ditësh.

Akti i Kurbanit (kurbani) kryhet pas Faljes së Bajramit (Lutjet e Bajramit), të cilat kryhen me njerëz në Xhaminë më të afërt në mëngjesin e Bajramit.

Ai konsiston në therjen e një kafshe si flijim për të shënuar këtë rast në përkujtim të flijimit të Profetit Ibrahim për Zotin.

Kafsha duhet të jetë një dele, qengj, dhi, lopë, dem ose deve.

Ajo duhet të jetë në gjendje të mirë shëndetësore dhe mbi një moshë të caktuar në mënyrë që të theret, në një mënyrë “hallall” miqësore, islamike.

Mishi i Kurbanit mund të ndahet në tre pjesë të barabarta për aksion, një e treta është për ju dhe familjen tuaj, një e treta është për miqtë dhe e treta e fundit do t’u dhurohet atyre në nevojë.

Tradicionalisht, dita kalon duke festuar me familjen, miqtë dhe të dashurit, shpesh të veshur me veshje të mira ose të reja dhe duke bërë dhurata.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.