Osmani, Blairit: Kosova është një nga trashëgimitë e juaja më të suksesshme

Presidentja e Kosovës, Vjosa Osmani në një konferencë të përbashkët me ish-kryeministrin e Britanisë së Madhe, Tony Blair, ka shprehur mirënjohje ndaj Blairit për kontributin që kishte dhënë në çlirimin e Kosovës, 25 vjet më parë, duke e vlerësuar si trashëgiminë më të suksesshme të tij.

“Kosova sot është një nga trashëgimitë e juaja më të suksesshme, është një nga mësimet se mbrojtja e lirisë, e paqes dhe demokracisë janë shtylla e civilizimit dhe janë obligim i secilit në çfarëdo kohe”, ka thënë Osmani në një konferencë të përbashkët me Blairin.

Për presidenten, Blair ishte “hero i lirsë e demokracisë” në vitin 1999, kurse tani është “hero i paqes”.

“Përkundër sfidave ju orientuat kompasin e historisë në anën e mbrojtjes së vlerave, që kanë përcaktuar kapitujt më të lavdishëm të historisë njerëzore”.

“Ndaj si atëherë që ishit hero i popullit të Kosovës, si dhe hero i lirisë dhe demokracisë, edhe sot jeni hero i paqes për vendimin e drejtë të asaj kohe dhe gjithë përkrahjen që ja keni dhënë Kosovës gjatë këtyre 25 viteve”, tha Osmani.

Sipas presidentes, Kosova është njëri ndër sukseset më të rëndësishme të Blairit.

“Me forcat aleate të NATO-së, ju na shpëtuat nga shfarosja e cila synohej nga regjimi gjenocidial i Millosheviç-it. Në kujtimet e juaja, ju vetë e keni thënë se intervenimi në Kosovë, ishte një betejë e demokracisë dhe diktaturës”.

E para e shtetit, ka theksuar se shumë fëmijë të 1999-së, mbajnë emrin e Tony Blairit duke treguar vlerën e madhe që ka ai për Kosovën e qytetarët.

“Shumë fëmijë të asaj kohe, mbajnë emrin e juaj mbajnë emrin Tony Blair, disa prej të cilëve do t’i takojmë sot, ata janë dëshmi se sa shumë gjurmë keni lënë tek populli jonë. Ata sot po rritën krahas me Kosovën dhe krahas me kujtimin që i dha shtytje lirisë sonë”.

“Ju jeni në Kosovë, për të tretën herë dhe do ta keni mundësinë të jeni edhe shumë herë për të shikuar progresin që ka bërë Kosova”.

Blair pas takimit me Osmanin, do të ketë takime edhe me kryeministrin e Kosovës Albin Kurti dhe kryetarin e Kuvendit, Glauk Konjufca.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.