Osmani bën thirrje për mbështetjen e Ukrainës: Kosova, pjesë e aleancave që mbrojnë vlerat e lirisë

Presidentja e Kosovës, Vjosa Osmani, në fjalimin përmbyllës në kuadët të Samitit të Paqes për Ukrainën në Zvicër, ku morën pjesë liderë nga 100 shtete të të gjitha kontinenteve, u ka bërë thirrje pjesëmarrësve në këtë samit që të vazhdojnë mbështetjen për luftën e Ukrainës kundër agresionit të Rusisë, ashtu sikurse mbështeten luftën çlirimtare të Kosovës para 25 vjetësh.

“Në ditët më të vështira për popullin tonë, shtetet demokratike na erdhën në ndihmë duke dërguar sinjal të qartë se nuk do të lejojnë shtypjen e shfarosjen e një populli që luftonte për lirinë e vet. 25 vite pas Kosova është pjesë e aleancave që po mbrojnë vlerat e lirisë”, deklaroi presidentja Osmani.

Autoritetet e Kosovës janë solidarizuar me Ukrainën menjëherë pas pushtimit rus në shkurt të vitit 2022. Kosova ka ndjekur shembullin e pjesës tjetër të bashkësisë së organizuar ndërkombëtare në krye me Shtetet e Bashkuara të Amerikës (SHBA), duke vendosur dhjetëra raunde sanksionesh ndaj Rusisë dhe ka nisur në Ukrainë dhjetra paketa të ndihmës ushtarake.

“Kolegë, 25 vjet më parë, unë kam qenë një fëmijë lufte: jam dëbuar nga shtëpia, jam fshehur nga granatimet e agresorit në male, duke mbajtur një radio të vogël në dorë, duke dëgjuar së bashku me shumë fëmijë të tjerë, ndërsa udhëheqës si ju diskutonin nëse do të na ndihmonin apo jo. Pastaj u bëra refugjate”, kujtoi presidentja Osmani, derisa vazhdoi më tej:

“Vendet tuaja nuk i mbyllën sytë ndaj vuajtjeve tona. Ju erdhët në shpëtimin tonë dhe më dhatë një shans të kthehem tani, 25 vjet më pas, dhe ju falënderoj që u bëtë shpëtimtarët tanë. Shpresoj t’u jepni të njëjtin shans fëmijëve të Ukrainës”, shtoi ndër të tjera shefja e shtetit të Kosovës.

Kosova shënoi 25-vjetorin e Ditës së Lirisë apo Çlirimit të Kosovës – atëherë kur tankset britanike “Challenger” në rrugë tokësore dhe “Apache-t” amerikanë përmbi qiell, në kuadër të trupave paqeruajtëse të aleancës së NATO-s, filluan marshimin në Kosovë – pas fushatës ajrore të aleancës kundër caqeve ushtarake e policore serbe në Kosovë, Serbi e Mal të Zi.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.