Osmani: “Ballkani i Hapur” është i rrezikshëm

Presidentja e Kosovës, Vjosa Osmani, gjatë një bashkëbisedimi në Rrjetin për Politikë të Jashtme në Gjermani, ka thënë se “Ballkani i Hapur” jo vetëm se është i rrezikshëm për Kosovën, por edhe e ngadalëson procesin e anëtarësimit të Ballkanit Perëndimor në Bashkimin Evropian.

“Ne besojmë fuqimisht se nga pikëpamja e sigurisë nga pikëpamja politike dhe ekonomike, si dhe nga pikëpamja e integrimit në BE, Ballkani i Hapur është absolutisht gjëja më e gabuar që duhet bërë për rajonin”, ka thënë Osmani.

Sipas Osmani, shtetet e Ballkanit Perëndimor në vend që të fokusohen në iniciativën e Ballkanit të Hapur duhet të fokusohen në Procesin e Berlinit

“Besojë fuqimisht se Procesi i Berlinit është zgjidhja e vetme për rajoni. Ballkani i Hapur vonon integrimin evropian dhe synon të zëvendësojë Procesin e Berlinit, i cili është i pamundur. Kjo iniciativë që u nis nga Novi Sad, nuk e përfshiu Kosovën si të barabartë me të tjerat shtete”, ka potencuar ajo.

Presidentja gjatë fjalimit të saj, ka folur edhe për procesin e dialogut Kosovë – Serbi duke e fajësuar këtë të fundit për mos stabilitet në rajon.

Ajo ka treguar se Kosova është e përkushtuar plotësisht ndaj dialogut duke marrë pjesë në çdo raund të negociatave përkundër faktit se Serbia kurrë nuk ka kërkuar falje për krimet që ajo ka bërë gjatë luftës së fundit në Kosovë.

“Ne kemi marrë pjesë në çdo raund të dialogut dhe kemi bërë propozime konkrete. Në anën tjetër Serbia nuk ka bërë asnjë propozim madje ajo ka refuzuar çdo propozim të Kosovës”

Sipas Osmanit, Kosova ka qenë pala më konstruktive në dialog duke bërë propozime që do të kontribuonin në stabilitetin e mëtejshëm të Ballkanit Perëndimor.

“Propozimi i Kosovës për çështjen e personave të zhdukur, është pika absolutisht më urgjente e dialogut  që duhet të trajtohet menjëherë”, ka përfunduar ajo.

Osmani, madje ka ritheksuar se në dialog me Serbinë nuk do të bisedojnë për integritetin territorial të Kosovës, dhe për pavarësinë e cila është shpallur më 17 shkurt të vitit 2008.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.