Opozitë-mazhorancë “bëhen bashkë” për dy komisione hetimore

Sot, në orën 10:00, do të mbahet seanca e radhës së Kuvendit të Shqipërisë.

Një pikë e nxehtë e rendit të ditës ka të bëjë me ngritjen e komisioneve hetimore për çështjet shumë të diskutuara mes opozitës dhe mazhorancës – “Inceneratorët”,  “Çështja Becchetti” dhe kontrollin e keqpërdorimit të burimeve të administratës shtetërore në zgjedhjet e 25 prillit, njohur ndryshe edhe si “masakra zgjedhore”.

Ndryshe nga vite më parë kur verdikti nuk dihej, kësaj here ai është i qartë a priori. Mazhoranca dhe opozita do të bëjnë bashkë votat për të miratuar dy nga këto tre komisione.

Përkatësisht, beteja e Partisë Demokratike për të pretenduarën “masakër zgjedhore” dhe kërkesa për hetimin e inceneratorëve në Tiranë, Elbasan dhe Fier, do të marrin miratimin e dy palëve.

Çështja Becchetti nga ana tjetër, do të shohë kartonët e kuq nga mazhoranca, duke mos e kaluar votëbesimin në Parlament të këtij projektvendimi.

Për këtë të fundit kreu i Grupit Parlamentar të Partisë Socialiste, Taulant Balla, e ka thënë hapur se ata do ta rrëzojnë kërkesën e Partisë Demokratike për ngritjen e këtij komisioni.

Balla e tha i prerë se kjo çështje duhet të shtyhet sipas sugjerimeve të Avokatit të Shtetit.

Ndërsa komisionin për “Inceneratorët” dhe asaj që PD-ja e cilëson “masakër zgjedhore”,  Balla njoftoi se do të votohet pro – ndonëse do të kërkohet të riformulohet objekti i hetimit.

Ka qenë nënkryetarja e Partisë Demokratike, Grida Duma, e cila të premten e 1 tetorit bëri me dije se Grupi Parlamentar ka depozituar zyrtarisht kërkesën për ngritjen e një komisioni hetimor mbi çështjen “Becchetti”.

Ajo tha se qëllimi qëndron që paratë të mos paguhen nga taksat e qytetarëve, por nga “ata që në të vërtetë shkaktuan dëmin, qeveria”.

Sipas saj, kjo çështje nisi për politikë dhe sot rezulton në tri dëme të mëdha.

Rendet e tjera të ditës

Pika tjetër kryesore e rendit të ditës është kthimi i ligjit “Për të huajt”, nga Presidenti i Republikës së Shqipërisë, Ilir Meta.

Më herët ministri i Brendshëm, Bledi Çuçi, deklaroi se ky projektligj është diskutuar gjerësisht me të gjithë organizatat dhe shoqërinë civile – si ndërkombëtare ashtu dhe vendase.

Ky projektligj synon përmirësimin e dispozitave të lidhura me çështjen e punësimit të shtetasve të huaj në Shqipëri, duke qartësuar afatet kohore dhe procedurat për t’u pajisur me leje unike.

Përveç kësaj në Kuvend do të diskutohen disa projektligje të cilat janë kthyer nga ana e Presidentit.

Njëra është kthimi i ligjit “Për menaxhimin e sistemit buxhetor në Republikën e Shqipërisë” të ndryshuar. Si dhe ai “Për disa ndryshime dhe shtesa në ligjin nr. 137/2020 ‘Për buxhetin e vitit 2021’”.

Gjithashtu do të diskutohet për propozimin Kuvendit të Shqipërisë të kandidaturave për anëtarë të Komisionit të Konkurrencës në Autoritetin e Konkurrencës.

Pika e fundit ka të bëjë me diskutime – për një orë – për çështje jashtë rendit të ditës.

Zyrtarisht Legjislatura e X-të ka nisur punë më 10 shtator – datë që përkon me dekretimin e saj nga Presidenti Meta.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.