Shqipëria

Opozita thërret ERE-n në Parlament, kërkon llogari për fashën 800 kWh


Enti Rregullator i Energjisë është thirrur përmes një kërkese për mocion me debat publik në mënyrë urgjente në Parlamentin e Shqipërisë, nga 15 deputetë të opozitës, të cilët e kanë firmosur dokumentin.

Lajmin e ka bërë të ditur deputeti i Partisë së Lirisë, Petrit Vasili, i cili përmes një postimi në median e tij sociale Facebook, akuzon institucionin rregullator se “ka marrë urdhër direkt nga Kryeministria”, për të pesëfishuar çmimin e energjisë elektrike.

“E kemi thirrur të tregojë se si shkeli pavarësinë e saj të garantuar me ligj, për t’iu bindur urdhrit të çmendur të Edi Ramës, i cili ishte pa asnjë bazë, por thjesht një provokim ndaj qytetarëve”, shkruan Vasili.

Kërkesa e Qeverisë shqiptare, ishte ajo e vendosjes së një fashe mbrojtëse prej 800 kWh për konsumatorët familjarë, ku deri në këtë vijë konsumi, nuk do të kishte rritje të çmimit të energjisë, duke e lënë atë në vlerën e 9.5 lekëve për kWh.

Ndërsa, konsumatorët, të cilët shpenzojnë përtej kësaj fashe mbrojtëse, do të paguajnë energjinë me një çmim prej 48 lekësh për kWh.

E gjithë kjo, bazuar në rritjen e vlerës së energjisë në tregun ndërkombëtar, ku për të plotësuar nevojat e brendshme, Shqipëria blen energji elektrike.

Pavarësisht këtij fakti, sipas opozitës, vendimi që ka ardhur është thjesht politik dhe resurset energjetike në vend, janë keqmenaxhuar gjatë kësaj periudhe.

Vetë kryeministri Rama, ka deklaruar më parë se Shqipëria nuk i ka ende kapacitetet për të plotësuar gjithë nevojat e saj energjetike në mënyrë autonome, ndaj duhet të dalë në treg për të blerë.

Ndërsa, në gjithë Evropën, çmimet e rrymës dhe të gazit, janë shumëfishuar pas krizës që përfshiu kontinentin e vjetër, si rezultat i luftës në Ukrainë dhe bllokimit të pjesshëm të gazit rus drejt vendeve të Bashkimit Evropian.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com

Lajmet kryesore