Kosova

Opozita s’u beson sondazheve, kërkojnë zgjedhje


Foto: Albanian Post.

Një sondazh i publikuar të premten që e radhiti Lëvizjen Vetëvendosje me 49.5 për qind, Partinë Demokratike të Kosovës (PDK), me 17.1 për qind dhe Lidhjen Demokratike të Kosovës (LDK), me 16 për qind dërgoi sërish në përplasje mes pushtetit dhe opozitës.

Fillimisht nga Lidhja Demokratike e Kosovës (LDK), ky sondazh është konsideruar sulm ndaj tyre për shkak të përpjekjeve që po bëjnë për ta paraqitur realitetin.

Nënkryetari i LDK-së, Lutfi Haziri, ka përmendur arsyet se përse është publikuar ai sondazh në atë formë.

“Një javë pas opozitarizmit racional e të faktuar, punës së jashtëzakonshme në terren me qytetarët, interpelancës për tenderët njëburimor dhe videos së djeshme të kryetarit të LDK-së, paskan tentuar me fushatë ‘sondazhi’ të na sulmojnë”, ka shkruar ai të premten në rrjetin social ‘Facebook’.

Sipas tij, veprimet e tilla s’do ta ndalin partinë e tij.

“Ne ecim para drejt rikthimit të madh. Nuk ka kush na ndal. Ne kemi vendosur të punojmë deri në ditën e zgjedhjeve pa u ndal. LDK, shpresë e besë për Kosovën!”.

Lidhur me radhitjen e LDK-së në sondazhin e fundit ka reaguar edhe deputetja Hykmete Bajrami, duke thënë se realiteti është ndryshe nga rezultatet.

Kryetari i PDK-së Memli Krasniqi, kryetari i LDK-së Lumir Abdixhiku dhe kryetari i AAK-së Ramush Haradinaj.

“Mbajeni në mend, sa herë që ka një krizë, qeverisë i vjen një sondazh i ri. Herën e kaluar në ditën e faturave dyfish të energjisë elektrike, këtë herë në periudhën e shpërfaqjes së korrupsionit përmes kontratave sekrete e pazareve në katër sy”.

“Duan të paraqesin një realitet tjetër – fiktiv. Të na thonë se ne jemi vet. Se shumica është me ata – të kënaqur si dikur”, ka shkruar Bajrami.

Ajo ka marr shembull sondazhin për zgjedhjet lokale, sipas të cilit, Arben Vitia dilte i pari e Uran Ismaili i dyti, por në fund zgjedhjet i kishte fituar Pëparim Rama i LDK-së, që renditej i treti.

“Kur flasim për sondazhe kujtoni vetëm pak zgjedhjet lokale. Gjithë ekzaltimin e pushtetit atëherë, gjithë ‘kredibilitetin’ e matësve – një natë para zgjedhjeve. Fundin e dini të gjithë”.

Ndërsa, nga Partia Demokratike e Kosovës (PDK), u kërkua që të shkojnë në zgjedhje me 9 qershor, pasi edhe sipas tyre sondazhet jo gjithë herë janë të sakta.

Nënkryetarja e Partisë Demokratike të Kosovës, Vlora Çitaku, i ka bërë thirrje sërish Lëvizjes Vetëvendosje për zgjedhje të parakohshme.

“Sondazhet janë sondazhe. Herë ia qëllojnë, herë jo. Zgjedhjet janë zgjedhje. Ato janë të sakta. VV, nëse jeni të kënaqur, ejani shkojmë në zgjedhje. 9 Qershor?”, ka shkruar ajo.

Kurse, Aleanca për Ardhmërinë e Kosovës (AAK), s’ka pasur asnjë reagim për këto sondazhe të publikuara të premten.

Edhe, kryeministri i Kosovës, Albin Kurti, ka treguar gatishmërinë e tij për zgjedhje të reja, ndonëse të njëjtat po kërkohen të mbahen disa muaj para përfundimit të mandatit të tij.

“Unë kam shprehur gatishmërinë time që nëse opozita dëshiron zgjedhje të parakohshme mund ta bëjmë me 2\3 e kuvendit shpërndarjen e kuvendit dhe të shkojmë në zgjedhje”, kishte thënë Kurti.

Zgjedhjet e 14 shkurtit 2021

Albin Kurti, u zgjodh kryeministër i Kosovës në mars të 2021-së për herë të dytë sipas rezultateve preliminare të Komisionit Qendror të Zgjedhjeve (KQZ), ai shërbeu në të njejtën pozitë nga shkurti deri në qershor të 2020-së.

Rezultate këto që vinin nga zgjedhjet e mbajtura më 14 shkurt të vitit të ngjashëm.

Nga këto zgjedhje Lëvizja Vetëvendosje (LVV), siguroi 58 ulëse, Partia Demokratike e Kosovës (PDK) siguroi 19 ulëse, Lidhja Demokratike e Kosovës (LDK) siguroi 15 ulëse dhe Aleanca për Ardhmërinë e Kosovës (AAK), 8 ulëse.

KQZ-ja njoftoi se LVV-ja në zgjedhjet e 14 shkurtit kishte fituar 438 mijë e 335 vota (50.28%), PDK-ja 148 mijë e 296 (16.90%), LDK-ja 110 mijë e 978 (12.64%) dhe AAK-ja 62 mijë e 111 vota (7.07%).

Foto nga Atdhe Mulla.

Prioritetet e kryeministrit Kurti, të cilat u paraqiten me fitoren e zgjedhjeve të 14 shkurtit ishin lufta kundër korrupsionit dhe punësimi, vaksinimi i 60 për qind të popullatës kundër COVID-19 brenda një viti, rritja e prodhimit dhe eksportit si dhe fuqizimi i ndërmarrjeve publike.

Ai edhe me fitoren e zgjedhjeve thoshte se dialogun me Serbinë s’do ta kenë pjesë të prioriteteve, duke paralajmëruar vendosje të reciprocitetit ndaj Serbisë.

Gjatë fushatës zgjedhore për zgjedhjet e 14 shkurtit, lideri i Lëvizjes Vetëvendosje, Albin Kurti, kishte prezantuar programin e ardhshëm qeverisës të partisë së tij, duke thënë se dëshirojnë “të nxjerrin Kosovën nga kriza e shumëfishtë dhe ta vendosin në binarët e progresit”.

Në zgjedhjet e 14 shkurtit, nga mbi 1.7 milion qytetarë me të drejtë vote kanë votuar 48.78 për qind dhe vota të vlefshme, sipas KQZ-së, kanë qenë 877 mijë e 503.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com


Lajmet kryesore