Opozita me kritika ndaj kandidaturës së ministrit të Shëndetësisë, Arben Vitia
SHFLETO
Kandidati për kryetar të Prishtinës, Arben Vitia
Blerta Ismajli
14.08.2021 20:16
Loading Icons...
Pas zyrtarizmit të kandidaturës së Arben Vitisë, nga Lëvizja Vetëvendosje (LVV) për të parin e kryeqytetit, partitë opozitare kanë pasur kritika të ashpëra ndaj ministrit aktual.
Kritikat e tyre lidhen me gjendjen e krijuar së fundi nga pandemia COVID-19, duke e akuzuar ministrin Vitia për mos punë dhe tërheqje nga detyra kur vendit dhe sistemit i duhet më së shumti.
Ata po e shohin kandidaturën e Vitisë si tendencë për ikje nga përgjegjësia dhe nga situata e krijuar.
Nënkryetarja e Partisë Demokratike të Kosovës(PDK), Vlora Çitaku, përmes një postimi në rrjetin social Facebook, ka kritikuar ministrin e Shëndetësisë, Arben Vitinë, për kandidtimin për të parin e Prishtinës.
“Ministri i Shëndetësisë, në vend se të dorëzohet para gjendjes alarmante dhe t’i lë të vetmuar punëtorët shëndetësorë dhe qytetarët për të garuar në zgjedhje lokale, duhet urgjentisht ta decentralizojë dhe thjeshtëzojë procesin e vaksinimit duke ofruar shërbime edhe në qendrat e mjekësisë familjare, si dhe nëpër qendra mobile”, ka shkruar Çitaku.
Sipas saj, shëndeti i qytetarëve është me rëndësi.
“Asgjë nuk është më i rëndësishëm se shëndeti publik. Kjo lloj apatie nga ana e institucioneve është e papranueshme”.
Kritika ka pasur edhe nga Lidhja Demokratike e Kosovës.
Ish-ministri i Shëndetësisë, Armend Zemaj, është drejtuar ashpër ndaj kryeministrit, Albin Kurti, dhe ndaj ministritë të Shëndetësisë, Arben Vitisë.
“E keqja nuk po ka fund! Sot i kemi 1.370 raste të reja me Covid-19 dhe 1 të vdekur. Ndërkaq, ministrin e Shëndetësisë dhe kryeministrin i ka tërbuar tërësisht lufta për pushtet”.
“ Në fazën më kritike të epidemisë në Kosovë, me rritjen enorme të rasteve pozitive me Covid-19, ku vala e infeksionit me variantin Delta ka marrë përpjetën, Qeveria mendon veç për vota e pushtet”, shkruan Zemaj në rrjetin social Facebook.
Ndërsa ish-ministri i Drejtësisë, Selim Selimi, përmes një postimi në rrjetin social Twitter ka ironizuar me kandidatin e Lëvizjes Vetëvendosje.
Selimi kandidatin për Prishtinën e ka quajtura edhe punëtorë sezonal.
“Urime kandidatit te VV për Prishtinë. Puntor sezonal i qendrës. Sapo që të përkeqësohet situata e ndrron “baushtellën”, ka shkruar Selimi.