Për opozitën Klinika e Onkologjisë, vazhdon të jetë në një gjendje jo të mirë, kjo pasi që e njëjta ndonëse është e vetmja qendër për trajtimin e të prekurve me kancer vazhdon të ketë “mungesë të terapive” dhe “mungesë të barnave” edhe pas milionave që janë shpenzuar nga buxheti që i takon ministrisë së Shëndetësisë.
Ish ministri i Shëndetësisë dhe deputeti i Lidhjes Demokratike të Kosovës, Armend Zemaj, të premten gjatë vizitës së tij në këtë klinikë ka thënë se nuk është në rregull që të shpenzohen miliona të buxhetit e sërish të ketë mungesë të terapisë.
Sipas tij, në raste të tilla përgjegjësinë e ka pushteti të tregojë se çfarë po ndodh.
“Jemi duke parë shpenzim milionësh të buxhetit dhe sërish ka ankesa për mungesë të terapisë. Atëherë, ky bartet në nivel tjetër të përgjegjësisë dhe jo në nivelin e juaj. Nga statistikat që i kemi parë, në disa barna shpenzohen miliona, ndërsa në të gjithë Evropën nuk ka shpenzim aq milionësh që paguan buxheti i Kosovës. Kjo, atëherë, krijon mungesa të përmbushjes së pjesës tjetër të terapisë”, ka deklaruar Zemaj.
Kurse, deputeti i Partisë Demokratike të Kosovës, Bekim Haxhiu, deklaroi se përveç mungesës së terapisë ka edhe mungesë të barnave.
“Buxheti për barna është rritur e ankesat e qytetarëve për mungesa të barnave vazhdojnë të jenë. Kjo tregon se diçka nuk është në rregull në sistemin tonë shëndetësor. Po ashtu, po ka rritje të çmimeve të barnave, siç ndodhi në rastin e fundit kur u miratua Ligji për Barna. Kur u publikua lista e barnave, ato dolën të jenë më të shtrenjta sesa që ishin më përpara”, tha Haxhiu.
Këtyre kritikave të opozitës iu përgjigj kryeministri i Kosovës, Albin Kurti, të premten në mbrëmje.
Për Kurtin, Klinika e Onkologjisë sot është krejt tjetër nga gjendja në të cilën ka qenë në të kaluarën.
“Adresa e klinikës është e njëjtë, por Klinika e Onkologjisë sot është krejt tjetër”.
Ai përmes një shkrimi të gjatë thuri lavde për punën e bërë në këtë klinikë gjatë qeverisjes së tij.
“Ajo është e pajisur me Akseleratorin e gjeneratës së fundit, që krahas trajtimit më të mirë të sëmundjeve, ka eliminuar kohën e pritjes së pacientëve dhe tash të gjithë pacientët mund të marrin trajtim brenda vendit”, ka shkruar Kurti.
Ndër të tjera deklaroi se përveç se është rritur buxheti për barnat, edhe lista esenciale e tyre është zgjeruar.
“Lista e barnave esenciale është zgjeruar për shkak se buxhetin për barna esenciale e kemi rritur për 150%.
Kreu i ekzekutivit tutje ka thënë se për herë të parë klinika është pajisur me klimatizim dhe digjitalizim të shërbimeve.
“Klinika ka sistemin e teknologjisë së fundit laserik C-RAD, i vetmi i teknologjisë së tillë në rajon, përmes së cilit ofrohet siguri maksimale gjatë rrezatimit të pacientëve që i nënshtrohen radioterapisë në këtë klinikë”.
Sipas Kurtit, edhe numri i shtarëtëve është rritur.
“60 shtretërve modern së shpejti pritet t’i shtohen edhe 50 të tjerë për ta çuar në 110 numrin total të tyre, nga vetëm 45 sa ishin para dy muajve e për shumë vite rresht”.
Ndër të tjera, ka thënë se po ofrohen edhe vaksina falas.
“Në të njëjtën kohë, po ofrohet falas vaksina HPV për sëmundjen e kancerit të qafës së mitrës”.
Duke paralajmëruar se, “javën tjetër radhën e ka Klinika e Urologjisë”.
Më 20 maj, është përuruar rinovimi i Klinikës së Onkologjisë, e njëjta sipas deklaratave që janë dhënë nga krerët e shtetit tash i ka 60 shtretër nga 45 sa ishin para rinovimit.
Klinika e Onkologjisë në Prishtinë është e vetmja qendër në Kosovë ku të prekurit me kancer marrin kimioterapinë apo trajtime të tjera.
Nga kjo sëmundje në Kosovë regjistrohen çdo vit pothuajse 1 mijë e 500 raste të reja.
Në këtë klinikë brenda 24 orësh, shërbime marrin rreth 400 pacientë, që vijnë nga qytete të ndryshme të Kosovës.
Sipas Organizatës Botërore të Shëndetësisë, kanceri është ndër shkaqet kryesore të vdekjeve në mbarë botën.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
