Opozita e pushteti përplasen në Komisionin për Shëndetësi për unifikimin e çmimeve të barnave
![](https://albanianpost.com/wp-content/uploads/2024/05/foto-nga-komisioni-per-shendetesi-300524.jpg)
Deputeti i Partisë Demokratike të Kosovës, Bekim Haxhiu, në Komisionin parlamentar për Shëndetësi, është shprehur i zhgënjyer pas publikimit të listës së çmimeve të barnave – kjo pasi sipas tij në to ka rritje të çmimeve.
Sipas tij, kjo është duke ndikuar drejtpërdrejtë edhe në rritjen e varfërisë së qytetarëve.
“I zhgënjyer me atë që kam parë pas publikimit të listës së çmimeve të barnave, ku barnat të cilat sot janë në treg me pakicë, në listën e çmimeve dalin shumë më shtrenjtë sesa që janë në treg me pakicë. Rritja e çmimit të barnave ndikon drejtpërdrejtë edhe në rritjen e varfërisë së qytetarëve”, tha Haxhiu.
Por, që nga pushteti konsideruan se Qeveria është angazhuar për zvogëlimin e varfërisë, duke përmendur disa nga masat që kanë marrë.
“Kjo qeveri në këto tri vite e gjysmë ka treguar se është shumë e interesuar për zvogëlimin e varfërisë, me vendime direkte me përkrahjen direkt me materiale lehona, me përkrahjen direkte të fëmijëve, pastaj me Super punën, me përkrahjen e të rinjve, me produkte të veçanta ka ndikuar drejtpërdrejtë në eliminimin e formave të varfërisë që është objektivi i parë”, tha deputeti i Lëvizjes Vetëvendosje, Haxhi Avdyli.
Por, që nga deputeti Haxhiu sërish pati kundërpërgjigje në drejtim të Avdylit.
“Politika e kësaj qeverie është që të varfërojnë qytetarët me shtrenjtimin e energjisë elektrike dhe produkteve”.
“Me ia shtrenjtua rrymën i nderuari Haxhi, qytetarëve mbi 100 për qind edhe me iu dhanë qytetarëve 1 herë nga 100 euro nuk është politikë për zhvillim të qëndrueshëm por është lëmoshë për qytetarët. Sepse, sipas asaj që po e shoh, politika e qeverisë është që të varfërojnë qytetarët me shtrenjtimin e energjisë dhe produkteve”, tha Haxhiu.
Që nga paslufta, asnjëherë spitalet publike në Kosovë nuk kanë arritur ta përmbushin listën esenciale të barnave 100 për qind. Si rrjedhojë, vazhdimisht ka pasur mungesë të tyre dhe pacientët detyrimisht janë obliguar që gjatë trajtimit t’i blejnë vetë ato.
Organizata Botërore e Shëndetësisë ka qenë ajo që ka ofruar ndihmë në zhvillimin e politikave sa i përket udhëzimit që unifikon çmimin e barnave, në mënyrë që të reduktohen shpenzimet e pacientëve për blerjen e barnave.
Për dy dekada, në Kosovë nuk ka çmim të unifikuar të barnave, sepse sipas tyre, në fuqi ka qenë një rregullore administrative, e cila nuk ka paraparë unifikimin e çmimit.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com