OKB: Izraeli duhet të largohet brenda 12 muajve nga territoret palestineze

Asambleja e Përgjithshme e Kombeve të Bashkuara miratoi të mërkurën një rezolutë të hartuar nga palestinezët që i kërkon Izraelit t’i japë fund “pranisë së tij të paligjshme në Territorin e Pushtuar Palestinez” brenda 12 muajve.

Rezoluta mori 124 vota pro, ndërsa 43 vende abstenuan mes tyre, Shqipëria. Izraeli, Shtetet e Bashkuara dhe 12 vende të tjera votuan kundër.

Lajmi u bë i ditur nga agjencia britanike “Reuters”.

Veprimi izolon Izrael-in disa ditë përpara se liderët botërorë të udhëtojnë në New York për mbledhjen e tyre vjetore të OKB-së.

Kryeministri izraelit Benjamin Netanyahu do të mbajë fjalim në Asamblenë e Përgjithshme prej 193 anëtarësh më 26 shtator, në të njëjtën ditë me presidentin palestinez Mahmud Abbas.

Rezoluta mirëpret një opinion këshillues të korrikut nga Gjykata Ndërkombëtare e Drejtësisë që tha se pushtimi i territoreve dhe vendbanimeve palestineze nga Izraeli është i paligjshëm dhe duhet të tërhiqet.

Opinioni këshillues – nga gjykata më e lartë e Kombeve të Bashkuara, e njohur gjithashtu si Gjykata Botërore – thoshte se kjo duhet të bëhet “sa më shpejt të jetë e mundur”, megjithëse rezoluta e Asamblesë së Përgjithshme vendos një afat 12-mujor.

Rezoluta është e para që paraqitet zyrtarisht nga Autoriteti Palestinez pasi fitoi të drejta dhe privilegje shtesë këtë muaj duke përfshirë një ulëse midis anëtarëve të OKB-së në sallën e asamblesë dhe të drejtën për të propozuar projekt-rezoluta.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.