OKB dënon sulmin ajror në Yemen

Organizata e Kombeve të Bashkuara ka dënuar sulmin ajror të kryer nga forcat e koalicionit saudit të premten e 21 janarit, në një burg të Yemen-it, ku të vdekur mbetën mbi 70 persona.

Godina e gjendur në Saada, një bastion i grupimit rebel Houthi në veri të Yemen-it, ishte qendra e sulmit.

Ka qenë sekretari i përgjithshëm i Kombeve të Bashkuara, Antonio Guterres, ai i cili i bëri thirrje të menjëhershme palëve, për të ndaluar përshkallëzimin e konfliktit.

Gjithsesi, pala e koalicionit saudit, ende nuk e ka pranuar autorësinë e sulmit. Prej tyre, u tha se ajo godinë, nuk ka qenë në shënjestrën e tyre në asnjë çast. Por, vendi sipas tyre, nuk ishte ndër ato të dakordësuar për të mos u sulmuar nga OKB-ja apo Kryqi i Kuq.

Lufta mes koalicionit saudit dhe rebelëve Houthi, vijon që prej 2015-ës.

Gjatë këtij intervali kohor, dhjetëra mijëra njerëz kanë humbur jetën ose janë plagosur. Në shifra përfshihen edhe mbi 10 mijë fëmijë, të cilët janë prekur direkt nga zhvillimet atje.

Yemen-i gjendet në një kaos të vërtetë, i ndarë në katër pjesë, me shumicën e vendit në krizë humanitare të skajshme.

Miliona njerëz kanë ndërruar vendbanime, për shkak të zonave të gjera të luftës. Një pjesë e mirë e tyre po vuajnë urinë e skajshme dhe po luftojnë për bukën e përditshme.

Ndërsa, mbi goditjen e fundit që ka ardhur, numri i saktë i viktimave ende pritet, pasi gërmimet vijojnë nën gërmadha.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.