Marcelo Vieira, kapiteni i Real Madrid-it, po kalon sezonin e fundit te klubi mbretëror.
Kështu e kanë bërë të ditur shumë media spanjolle, të cilat thonë se Real Madrid-i nuk do t’ia rinovojë kontratën Marcelo-s.
Kontrata e brazilianit skadon në fund të këtij sezoni.
Braziliani do të largohet nga Madrid pas një dekade e gjysmë në “Santiago Bernabeu”, ku ka arritur të fitojë gjithçka që dikush mund të fitojë në nivel klubesh.
Por, rënia e papritur e formës dhe transferimi i Ferland Mendy, Marcelo-n e kanë shndërruar në një prej opsioneve të fundit për skuadrën e Ancelotti-t.
Në këtë mënyrë, me marrëveshje të përbashkët me klubin, ai po kërkon një klub për të ardhmen e tij.
Marcelo do të largohet me parametra zero, por për të nuk ka ndonjë ofertë nga klubet evropiane.
Sipas raportimeve të fundit që vijnë nga Brazili, Botafogo është e gatshme që t’ia ofrojë Marcelo-s rikthimin në vendlindje.
Por, përveç Botafogo-s, Marcelo ka pasur edhe oferta të tjera nga Brazili.
Skuadrat e interesuara për shërbimet e tij janë Flamengo, Atletico Miniero dhe Palmeiras.
Përveç Marcelo-s, nga Real-i gjatë verës së ardhshme kontrata do t’iu përfundojë edhe dy futbollistëve tjerë, që janë Isco dhe Gareth Bale, as për këta lojtarë madrilenët nuk e kanë në plan rinovimin.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
