Nuk ka baza për ndonjë hetim për korrupsion në çështjet e biznesit të bashkëshortes së kryeministrit spanjoll Pedro Sanchez, Begona Gomez.
Kështu ka deklaruar së fundmi zëdhënësja e qeverisë, Pilar Alegria.
“Ne e dimë se nuk ka absolutisht asgjë këtu”, u ka thënë gazetarëve Alegria.
Reagimi ka ardhur pasi një gjykatë ka lëshuar një thirrje që Gomez të paraqitet si pjesë e një hetimi paraprak në lidhjet e saj të biznesit.
Sakaq, ajo ka shtuar se çështja bazohet në “gënjeshtra dhe dezinformata”.
Një gjykatë e Madridit lëshoi të martën një thirrje për bashkëshorten e kryeministrit për t’u paraqitur më 5 korrik si pjesë e një hetimi paraprak për korrupsion në lidhjet e saj të biznesit.
Masa vjen pasi gjykata javën e kaluar refuzoi kërkesën e prokurorëve për të mbyllur hetimin ndaj Begona Gomez, duke treguar se kishte prova “të mjaftueshme” për të justifikuar vazhdimin e hetimit.
Vendimi për të hapur hetimin ishte një pengesë për kryeministrin, por një nxitje për kundërshtarët e tij të krahut të djathtë, të cilët e shohin këtë veprim si justifikim të pretendimeve të tyre se ai dhe qeveria e tij e majtë janë të korruptuar.
“Ka prova se një vepër penale e supozuar është kryer, e cila shkon përtej dyshimit të thjeshtë dhe ishte e mjaftueshme” për të lejuar vazhdimin e hetimit, thanë dokumentet e gjykatës.
Gjykata “ka thirrur Begona Gomez të paraqitet si palë e hetuar të premten më 5 korrik në orën 10:00 si pjesë e një hetimi paraprak mbi veprat e dyshuara të korrupsionit në sektorin privat dhe tregtisë me ndikim”, thuhet në deklaratë.
Gjykata hapi hetimin ndaj Gomez për shitje të dyshuar të ndikimit dhe korrupsion më 16 prill, pas një ankese të paraqitur nga një OJQ kundër korrupsionit e lidhur me të djathtën ekstreme.
Grupi, Manos Limpias, thotë se ankesa e tij bazohet në raportet e mediave. Po ashtu ka ngritur më parë një sërë padish të pasuksesshme kundër politikanëve në të kaluarën.
Çështja përqendrohet në kontratat publike të dhëna një biznesmeni që kishte marrëdhënie profesionale me Gomez.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
