![](https://albanianpost.com/wp-content/uploads/2024/06/4555555555555555555555.png)
Kujdes: Disa pjesë të tekstit të mëposhtëm përmbajnë detaje shqetësuese.
Të paktën 50 persona u vranë nga ushtarët e Myanmar-it në një bastisje në një fshat në shtetin Rakhine javën e kaluar.
Kështu kanë thënë banorët vendas dhe forcat opozitare.
Dëshmitarët okularë kanë rrëfyer për median britanike BBC se fshati iu nënshtrua terrorit për dy ditë e gjysmë pasi ushtarët iu lidhën sytë dhe i rrahën, derdhën benzinë të djegur në lëkurë dhe i detyruan disa prej tyre të pinin urinën.
Ata po kërkonin mbështetës të Ushtrisë Arakan (AA), e cila është bërë një nga forcat luftarake etnike më efektive në Myanmar.
Pesëdhjetë e një persona të moshës ndërmjet 15 dhe 70 vjeç u “torturuan dhe u vranë dhunshëm”, ka thënë në një deklaratë Qeveria e Unitetit Kombëtar (NUG), që përfaqëson qeverinë civile të rrëzuar.
AA vlerësoi se numri i të vdekurve ishte më shumë se 70 persona.
Këshilli ushtarak në pushtet, ose junta, i ka mohuar akuzat, të cilat do të përbënin një nga mizoritë më të këqija të kryera në luftën civile trevjeçare të Myanmar-it.
“Ata i pyetën burrat nëse AA ishte në këtë fshat”, ka treguar një grua për BBC.
“Çfarëdo përgjigje që të jepnin, nëse thonin se AA ishte aty apo nuk ishte, apo nuk e dinin, ushtarët i goditën”.
Në vetëm gjashtë muaj, AA ka përfshirë pjesën më të madhe të Rakhine, duke e detyruar ushtrinë të vazhdojë të tërhiqet.
I dha fund një armëpushimi me ushtrinë vitin e kaluar dhe iu bashkua kryengritësve etnikë në pjesë të tjera të vendit në një operacion të kombinuar që synonte përmbysjen e juntës që mori pushtetin në shkurt 2021.
“E kam parë me sytë e mi duke e marrë burrin me një mjet ushtarak, djalin e kanë ndarë nga ne të dy dhe nuk e di ku është. Tani nuk e di nëse djali dhe burri im janë gjallë apo vdekur”, ka thënë gruaja për BBC-në.
Dëshmitarët i kanë thënë BBC-së se të gjithë në fshatin, i cili ka pak më shumë se njëmijë familje, u mbajtën jashtë për dy ditë, nën diell, me pak për të ngrënë apo pirë, ndërsa dhjetëra burra u lidhën dhe disa u morën në kamionë për marrje në pyetje të mëtejshme.
Shumë nuk janë kthyer ende.
“Ata ishin kaq të etur, qëndronin gjithë ditën në diell dhe lypnin ujë. Por ushtarët urinuan në shishe uji dhe ua dhanë burrave”, ka thënë gruaja për BBC.
Ajo ka treguar se dëgjoi “shumë të shtëna armësh”, por nuk pa se kush u qëllua “sepse duhej të ulnim kokën”.
“Nuk guxova të shikoja. Ata thirrën dikë që qëndronte pranë meje. Pastaj dëgjova një të shtënë. Ai nuk u kthye më”.
Ajo po qante gjatë gjithë kohës sepse ishte e shqetësuar për burrin dhe djalin e saj.
“Nuk e dija nëse ishin të vdekur apo të gjallë. Po lutesha për ta, Buda, të lutem shpëtoji ata”.
Të mbijetuarit kanë thënë se mund të dëgjonin ushtarët që kërkonin lopata për të varrosur trupat. Disa ishin qartësisht të dehur.
Më shumë se 100 ushtarë besohet se kanë bastisur fshatin Byai Phyu, i cili është pak jashtë kryeqytetit shtetëror të Sittwe, të mërkurën.
Sitwe, një qytet me rreth 200 mijë banorë, një port dhe aeroport i madh, është një nga bastionet e pakta të mbetura të ushtrisë birmaneze.
Por kryengritësit janë afër dhe gëzojnë simpatinë e shumicës së popullsisë etnike Rakhine.
Burrat që kishin tatuazhe që tregonin mbështetje për AA u veçuan për trajtim veçanërisht të ashpër, kanë shtuar vendasit.
Një dëshmitar okular ka thënë se ushtarët prenë lëkurën e bërë tatuazh, derdhën benzinë mbi të dhe e ndezën.
Një tjetër dëshmitar okular kujtoi një oficer ushtrie që u ka thënë fshatarëve se kishte ardhur nga luftimet në shtetin verior të Shanit, ku ushtria pësoi humbje të mëdha në fund të vitit të kaluar, për t’u hakmarrë ndaj tyre.
Humbja e shtetit Rakhine në kufirin me Bangladeshin do të ishte një nga poshtërimet më të mëdha të pësuar ndonjëherë nga forcat e armatosura, të cilat kanë dominuar Myanmar-in që nga pavarësia në vitin 1948.
Të premten ata që kishin mbetur në këmbë, kryesisht gra, fëmijë dhe pleq, u urdhëruan të mblidhnin disa gjëra dhe të largohen.
Ata kanë treguar se ushtarët kishin grabitur tashmë çdo gjë të vlefshme, si ar, stoli apo panele diellore nga shtëpitë e tyre.
Vendasit fillimisht u dërguan në një stadium në Sittwe, por shumica janë zhvendosur për të kërkuar strehim në manastiret budiste në qytet.
BBC e kupton se ushtria ende kontrollon Byai Phyu dhe askush nuk po lejohet të kthehet. Raportohet se pjesa më e madhe e fshatit është djegur.
NUG ka premtuar të sjellë para drejtësisë ata që janë përgjegjës për krimet e luftës në Byai Phyu.
AA akuzoi gjithashtu atë që e quan “këshilli ushtarak fashist” për “mizori të egër” dhe për përdhunim në grup të disa prej grave në Byai Phyu.
Junta ka mohuar të gjitha akuzat për tortura, duke deklaruar se ata po kryenin masa “paqe dhe sigurie” në fshat pasi kishin pikasur bunkerë me thasë rëre atje.
Po ashtu akuzon Ushtrinë Arakan se ka nisur sulme me dron nga ajo zonë e Sitwe.
Izolimi i Rakhine dhe intensiteti i konfliktit e bëjnë të pamundur çdo hetim të pavarur të asaj që ndodhi në Byai Phyu për të ardhmen e parashikueshme.
Por rrëfimet e dhëna nga të mbijetuarit janë një paralajmërim ogurzi se çfarë mund të ndodhë diku tjetër në Myanmar, ndërsa ushtria vazhdon të humbasë terren ndaj një lëvizjeje opozitare të armatosur gjithnjë e më të sigurt dhe të aftë.
Marrë nga “BBC”, përshtatur për “Albanian Post”.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com