Lajme

Njohja e targave nga Serbia për ta amortizuar presionin e Perëndimit, thotë Kurti


Albin Kurti

Kryeministri i Kosovës, Albin Kurti, në mbledhjen e fundit të Qeverisë së Kosovës për vitin 2023, ndërsa ka komentuar njohën e targave të shtetit të Kosovës nga ana e Serbisë, ka deklaruar se një gjë e tillë nuk dëshmon konstruktivitetin e Beogradit zyrtar, por është thjesht një tentim për të ulur kritikat nga komuniteti ndërkombëtar pas parregullësive dhe mashtrimit në zgjedhjet e 17 dhjetorit atje.

“Pra, targat në Kosovë në shtator të vitit 2021 përdoreshin në Kosovë për të kërcënuar Kosovën përmes avionëve mig 29. Ndërsa tash targat po përdoren për të ulur presionin nga Perëndimi demokratik mbi Serbinë për zgjedhjet jo të rregullta dhe jo demokratike”.

Vendimi për targat, sipas Kurtit, po përdoret gjithashtu për të mbuluar refuzimin zyrtar të Marrëveshjes Bazike nga ana e kryeministres së Serbisë, Ana Brnabiç dhe për të maskuar dështimin e Serbisë e në Banjë me 24 shtator.

“Kështu duhet të lexohet ky veprim i Serbisë, që më shumë se konstruktivitet dhe hap drejt normalizimit është një manovër e radhës, jo për hir të shtetit serb kurrsesi për atë të Kosovës, por për hir të pushtetit në Beograd”.

Kurti, ndër të tjera ka thënë se Qeveria do të marrë vendim për t’i lejuar targat e Serbisë, pasi që Policia e Kosovës të sigurohet se Serbia po e zbaton plotësisht dhe pa pengesa vendimin që targat RKS të qarkullojnë lirshëm në Serbi.

Më 25 dhjetor, i ashtuquajtur shefi i Zyrës për Kosovën në Qeverinë serbe, Petar Petkoviç, kumtoi lajmin se nga 1 janari i vitit 2024, veturave me targa RKS do t’iu mundësohet lëvizja e lirë në territorin e Serbisë.

Megjithatë, ai nuk specifikoi nëse targat e veturave do të mbulohen me letra ngjitëse kur të kalojnë kufirin, praktikë që aktualisht zbatohet.

Për çështjen e lëvizjes së Lirë, Kosova dhe Serbia kishin arritur marrëveshje më 2011, në kuadër të dialogut.

Para praktikës së letrave ngjitëse, automjetet me targa RKS detyroheshin të merrnin targa provuese në kufirin me Serbinë, që vlenin 60 ditë dhe kushtonin 5 euro.

Por, më 20 shtator të vitit 2021, Qeveria e Kosovës vendosi masën e reciprocitetit, që detyroi edhe shoferët nga Serbia ta kalonin të njëjtën procedurë për të hyrë në Kosovë.

Kjo masë nxiti pakënaqësi në mesin e serbëve në Kosovë, të cilët bllokuan rrugët që çonin në pikëkalimet kufitare me Serbinë, në Jarinjë dhe Bërnjak.

Për të ulur tensionet, me ndërmjetësimin e BE-së, më 30 shtator 2021, u arrit marrëveshja e përkohshme për targat.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com


Lajmet kryesore