Forumi për Siguri dhe Demokraci (FBD) në Serbi, nëpërmjet një reagimi publik, apeloi të enjten tek institucionet kompetente serbe që të bëjnë gjithçka në mënyrë që të zbardhen të gjitha rrethanat e sulmit terrorist të paramilitarëve serbë të ndodhur më 24 shtator 2023 në Banjë të Zveçanit – komunë e banuar me shumicë serbe – në pjesën veriore të Kosovës.
Millan Radoiçiç, ish-nënkryetari i Listës Serbe – forca më e madhe politike e serbëve të Kosovës – pranoi publikisht përgjegjësinë për organizimin dhe pjesëmarrjen në sulmin e 24 shtatorit. Megjithatë, ai dhe të tjerët që janë përgjegjës për terrorizmin e vitit të kaluar në territorin kosovar nuk janë thirrur ende nga organet e drejtësisë në Serbi të japin përgjegjësi.
FBD kërkoi që, në përputhje me ligjin, të vendosen sanksione jo vetëm ndaj përgjegjësve të drejtpërdrejtë për terrorizmin në veriun e Kosovës, por edhe ndaj të gjithë grupeve dhe individëve që ndihmuan në armatosjen e grupit të Radoiçiçit, derisa paralajmëroi se moszbardhja e rastit do të ketë implikime serioze për rrugën e Serbisë drejt Bashkimit Evropian (BE).
Duke qenë se në këtë fazë, asnjë prej shteteve kryesore perëndimore nuk ka bërë publike rezultatet e hetimeve për sulmin paramilitar të 24 shtatorit, zyrtarë institucionalë dhe vëzhgues të huaj kanë kërkuar nga bashkësia e organizuar ndërkombëtare të përgjigjen dhe t’i prezantojnë të gjeturat e hetimeve, për shkak se autoritetet serbe e mohojnë përfshirjen në këtë sulm.
Në këtë drejtim, komuniteti ndërkombëtar ka kërkuar nga Serbia që përgjegjësit për sulmin terrorist të 24 shtatorit, ku ka mbetur i vrarë togeri i Policisë së Kosovës, Afrim Bunjaku, të sillen para drejtësisë, ndërsa për Radoiçiçin dhe 11 persona tjerë, tashmë ekziston një fletarrest ndërkombëtar i lëshuar nga Agjencia Ndërkombëtare e Policisë Kriminale (INTERPOL).
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
Lajmet kryesore
-
Masha e Vetëvendosjes – Kush është Dejona Mihali?
-
Rrjepaj në Komision: S’jam në dijeni të memos së Manastirliut, nuk e di nëse i është kthyer përgjigje
-
Rusia e kishte parashikuar inkursionin e Kurskut muaj më parë, tregojnë dokumentet
-
Intervistimi i Mihalit nga Specialja – Haradinaj: Rrethi i Mafisë Energjetike po ngushtohet
