Vetëm një nga ekipi i 125 rojeve të ambasadës britanike, arrit të evakuohej në Mbretërinë e Bashkuar.
Ai ndodhet në karantinë në një hotel në Londër, së bashku me familjen e tij. Për “The Guardian”, ai është shprehur i shqetësuar për situatën me të cilën përballen ish-kolegët e lënë prapa në Kabul.
Në dy javët e fundit, jeta për rojet e ambasadës britanike që mbeten në Kabul është bërë jashtëzakonisht e vështirë.
Ata janë larguar nga puna në kompaninë ndërkombëtare të sigurisë “GardaWorld”, e cila i punësoi ata sipas një kontrate të jashtme. Po ashtu ata nuk kanë marrë pagat e tyre të gushtit dhe as nuk kanë marrë pagën e ndërprerjes së premtuar.
Të nxitur nga premtimet e ndihmës në Mbretërinë e Bashkuar, dhe me shpresën se do të evakuoheshin atje, shumë shitën pronat e tyre – makina, televizorë, orenditë – dhe ua dorëzuan shtëpitë e tyre të afërmve.
Kur përpjekja për evakuim dështoi, disa u kthyen në shtëpitë e zhveshura nga mobiliet. Të tjerët janë detyruar të fshihen, pas vizitave nga përfaqësuesit talebanë.
Fati i punëtorëve të kontraktuar, disa prej të cilëve kaluan vite duke siguruar siguri për ambasadën britanike, është bërë një nga simbolet më të ashpër të procesit kaotik të evakuimit të Britanisë.
Kur rojet aplikuan për herë të parë për ndihmë në maj, ata u refuzuan nga skema e ndihmës emergjente e Ministrisë së Mbrojtjes për ata që kishin punuar ngushtë me qeverinë e Mbretërisë së Bashkuar (politika e zhvendosjeve dhe ndihmës afgane, Arap).
Atyre iu dërguan letra duke shpjeguar se nuk kishin të drejtë, sepse ata ishin punëtorë me kontratë dhe jo punonjës të drejtpërdrejtë të qeverisë.
Ata vunë në dukje se talebanët nuk kishin gjasa të bënin dallimin midis rojeve të punësuar sipas një kontrate të jashtme dhe anëtarëve të stafit. Pas mbulimit nga media, deputetët në Londër filluan të ushtrojnë presion mbi qeverinë.
Dy javë më parë, ministri i forcave të armatosura, James Heappey, njoftoi se rojet e “GardaWorld” ishin dërguar në aeroportin e Kabulit dhe ishin në proces evakuimi.
Në fakt asnjë prej tyre nuk ishte shpëtuar, edhe pse atë mëngjes kompania kishte kryer një operacion të suksesshëm nxjerrjeje për të gjithë stafin e saj të mërguar.
Disa orë më vonë pati një kthesë të papritur të qeverisë dhe Zyra e Jashtme lëshoi një deklaratë duke premtuar se, “ne do të ndihmojmë të gjithë ata roje afganë të sigurisë të kontraktuar përmes GardaËorld për të mbrojtur ambasadën. Atyre do t’u jepet e drejta për të hyrë në Britani dhe po punojmë përmes logjistikës sfiduese për t’i nxjerrë ata nga Kabuli”.
Sidoqoftë, ky angazhim i qartë dhe i vendosur po duket gjithnjë e më shumë si një premtim i zbrazët për stafin e “GardaWorld” që mbetet në Kabul.
Një përpjekje e rrezikshme e minutës së fundit për të evakuuar të gjithë rojet dhe familjet e tyre në 10 autobusë, të montuar nga GardaËorld javën e kaluar, u anulua pas shpërthimit jashtë aeroportit të enjten, i cili vrau më shumë se 100 njerëz.
Por burimet pranë përpjekjes për evakuim thanë se zyrtarët britanikë brenda aeroportit nuk ishin të prirur të përshpejtonin largimin e rojeve, të cilët kishin pritur në autobusë pranë portave të aeroportit për rreth 11 orë deri në kohën e shpërthimit.
Vetëm rreth tetë nga 185 rojet – përfshirë 60 të shkarkuar në maj kur ambasada britanike filloi të zvogëlohej – të marra për evakuim, u janë dërguar email nga Zyra e Jashtme duke i pranuar zyrtarisht në programet e zhvendosjes emergjente. Pjesa tjetër janë duke pritur, duke kontrolluar kutitë e tyre të postës elektronike çdo orë, të shqetësuar se mund të jenë harruar.
Rojet po mësohen me një jetë të re nën talebanët. Shumë prej tyre po qëndrojnë larg shtëpive të tyre për të shmangur vëmendjen e talebanëve nga shtëpia në shtëpi. Ata janë të shqetësuar se si do të mbajnë familjet e tyre pa pagë.
Situata me të cilën po përballen rojet është ajo me të cilën ballafaqohen punonjësit e ndihmës, gjyqtarët, akademikët, kineastët, reporterët e BBC që punojnë për shërbimin në Afganistan, përkthyesit – një listë e gjatë e njerëzve që kanë punuar ose promovuar regjimin e mëparshëm, tani duke kërkuar punë të re ose një mënyrë për të lënë vendin.
Mijëra njerëz të njohur si me pretendim të mundshëm për zhvendosje në Britani u bllokuan në Afganistan kur përfundoi transporti ajror.
Ndërkohë nga stafi menaxhues i “GardaWorld” nuk është dhënë asnjë koment.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
