Një ministër që s’di, një tjetër që s’do, grevistë që s’heqin dorë dhe një komision parlamentar që po mundohet

Në një takim që ishte thirrur nga Komisioni Parlamentar për Arsim, ku të pranishëm ishin anëtarë të Këshillit Grevist e ministra të qeverisë, me idenë që të gjendet një zgjidhje e të ndërpritet greva që tashmë ka rrumbullakosur një muaj, u tha qysh në fillim se ideja është që të flitet para publikut, me dashamirësi dhe me idenë e gjetjes së një zgjidhje.

Në këtë atmosferë mirëbesimi, mori fjalën ministri i Financave të Kosovës, Hekuran Murati, vetëm sa për ta prishur atë.

Fjalia e parë e tij ishte një pyetje drejtuar grevistëve – “Me cilën parti jeni?”, u tha Murati, duke transformuar krejtësisht ambientin e krijuar dhe ri-acaruar dy palët – grevistët që thonë se pa i marrë 100 euro shtesë në muaj derisa të votohet ligji për paga nuk kthehen në shkolla dhe qeverisë që nuk plotëson kërkesën e tyre dhe ua konteston qëllimin e protestës.

Për brutalitetin në qasje dhe tensionimin e takimit, Murati u kritikua jo vetëm nga deputetët e partive opozitare, por edhe nga vetë kryetari i komisionit që kishte thirrur takimin, deputeti i Lëvizjes Vetëvendosje, Ardian Gola.

Por, Murati s’çante kokën. I ftuar për të treguar implikimet që i ka buxheti nëse plotësohet kërkesa e sindikalistëve, ai fliste për krejt tjetër gjë.

“Kisha dashur t’iu njoh më mirë, me cilat parti jeni të afërt, sepse për ju zotëri kam dëgjuar se jeni i afërt pe një parti…”, vazhdoi t’i drejtohet Ymer Ymerit, përfaqësuesit të Sindikatës së Bashkuar të Arsimit, Shkencës dhe Kulturës dhe anëtarit të Këshillit Grevist.

“Kjo qasje tregon se ju s’jeni për zgjidhje”, i tha Ymeri Muratit.

Takimi i ri, por asgjë e re as nga Ministrja e Arsimit, Arbërie Nagavci, e cila përsëriti ato që thuhen tash e një muaj se si qeveria ka plotësuar të gjitha kërkesat e grevistëve përveç kësaj për 100 euro shtesë.

“Prandaj, po iu lus”, shtoi Nagavci, “kthehuni në shkolla dhe mos t’ua marrim të drejtën themelore të shkollimit fëmijëve tanë”.

Nga deputetët, më racional tregohej, profesor Jahjah Kokaj, i cili tha se “janë në pyetje fëmijët” e nga ajo që po shihte nuk i ngjante se shqetësimi binte aty, as nga grevistët as nga qeveria.

Kokaj shkencërisht shpjegoi se po vazhduan fëmijët kështu pa shkolla “do u shkaktohen dëme të pariparueshme, sepse procesi i zhvillimit fiziologjik nuk kthehet prapa”.

Ministrja Nagavci vazhdoi duke theksuar se kanë plotësuar “99 për qind të kërkesave të grevistëve”, por u përmirësua nga Ymeri duke deklaruar se “ju keni plotësuar gjëra po që s’kanë pasur të bëjnë me kërkesat tona”.

Pa ide të reja nga ministrat e as nga përfaqësuesit e grevistëve, kryetari i Komisionit, Ardian Gola, që është edhe vetë profesor universitar, dha vetë një propozim.

“Jam krejtësisht në anën e mësimdhënësve dhe e kuptoj se më e rëndë se për të gjithë të tjerët, kjo grevë është për vetë arsimtarët dhe për prindërit, por a mund të rishqyrtohet metoda e grevës derisa të gjendet një zgjidhje e pranueshme”, deklaroi Gola.

“Prandaj, a do të mund ta bënit për shembull që të filloni mësimin, por të mos i notoni nxënësit. Kështu nxënësit nuk humbin, por edhe ju keni në dorë një mjet të fortë për negocim”.

Ymeri tha se do t’ia paraqes anëtarësisë, por u tregua skeptik se do ta pranojnë këtë propozim.

“Ne jemi futur në grevë, si mjeti më i rëndë dhe nuk po reflekton qeveria. Mendoni ju se do reflektojnë sikur të shkojmë me një metodë më të butë?”, pyeti Ymeri, Golën.

Gjithsesi, takimi u ndërpre me këtë propozim që vështirë se do merret parasysh, derisa qeveria vazhdon të mos ketë një propozim konkret për grevistët dhe gjithashtu vazhdon të vë në pikëpyetje qëllimet e tyre, me vetë kryeministrin që tha ditë më parë në parlament se grevistët janë të lidhur me opozitën politike.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.